Со завршните зборови на Јовановски заврши главната расправа за овој предмет, а судијката Софче Гаврилова-Ефремова закажа изрекување на пресудата на 7 април
Не сум цвеќе за мирисање, рече обвинетиот Бојан Јовановски-Боки 13 во завршените зборови во случајот „Меѓународен сојуз“ и побара ослободителна пресуда бидејќи тврди дека не е виновен за измама на бизнисмените и за перење пари.
Тој ги обвини политичарите, владејачката гарнитура на чело со поранешниот премиер Зоран Заев, дека тие него го злоупотребиле, дека знаеле што се случува и дека без нивно знаење немало да дојде до ништо. Измамен сум, рече Јовановски, од Зоран Заев и Стефан Богоев, но најмалку од Фросина Ременски, која со него е обвинета за помагање на делото измама.
„Повеќе сум злоупотребен јас од нив бидејќи без нивно знаење сето ова не можело да се случи ниту да се потпише. Точно знаеме како функционира сè во оваа држава, сè се политизира. И овој случај е исполитизиран”,
рече Јовановски.
Тој и претходно неколкупати го споменуваше Заев, а судијката Софче Гаврилова-Ефремова во една пригода го прекина и му кажа дека имал шанси да го повика за сведок, но тоа не го направил.
Барајќи ослободителна пресуда, Јовановски рече дека од сето досега изнесено се утврдило дека кривичните дела што му се ставаат на товар не се сторени бидејќи немало ниту намера ниту мотив ниту идеја да бидат доведени во заблуда двете компании, „Пелистер“ и „Дрим Билдинг“, со кои потпишале договори.
„Единствено сме имале за цел да го оствариме проектот, а за тоа говорат и сведочењата на наводно оштетените кои велат веруваат. Силјан Мицевски од ‘Пелистер’ вели дека сака да го изгради старскиот дом, а другиот (Ардијан Амзоски од ‘Дрим билдинг’) вели ако не сум бил приведен ќе сум ги врател парите или ќе се завршел проектот. Кривично дело не постои“,
рече Боки.
За перењето пари, тој зборуваше дека работел чесно, заработувал и со договори и хонорарно, а семејствата на неговите родители, рече, се имотни, алудирајќи дека и од таму имал пари.
„Немојте да мислите дека стапнав од Марс и сум земал пари како од претходниот предмет ‘Рекет’ наводно од Камчев, потоа и од бизнисмените во овој предмет”,
рече Боки кој се осврна и дека не е точно оти парите ги користел и за 1 ТВ која според неговите тврдења работела чесно.
Со завршните зборови на Јовановски заврши главната расправа за овој предмет, а судијката Софче Гаврилова-Ефремова закажа изрекување на пресудата на 7 април.
Другите обвинети, адвокатите и обвинителството завршни зборови дадоа на минатото рочиште во средата.
Во предметот, Бојан Јовановски-Боки 13 е првообвинет и се товари за делата измама и перење пари. Јасна Мандиќ-Ерцеговиќ и асистенката Христина Блажевска, пак, се обвинети за помагање во овие дела, а Фросина Ременски се товари за помагање во делото измама. Таткото на Боки, Миле Јовановски, пак, е петтообвинет за помагање во перењето пари и за делото неовластено изработување, држење, посредување и тргување со оружје бидејќи при претрес во неговиот дом биле пронајдени три полуавтоматски пиштоли и муниција за кои немал дозвола. Како правно лице обвинета е и невладината организација.
Во овој предмет обвинителството тврди дека двајцата бизнисмени Силјан Мицевски и Ардијан Амзоски биле доведени во заблуда и измамени со проекти за изградба на Европски центар за возрасни лица и мобилни сервиси, па преку Македонската авторска агенција исплатиле речиси еден милион евра, Мицевски сума од 719 905, а Амзоски 233 821 евро.