Јовановски негира и дека манипулирал оти имал и поддршка од владата предводена од Зоран Заев и нагласи дека ја имал уште од самиот старт на формирање на невладината организација
Горд сум што бев претседател на невладина организација која во своето активно работење немаше добиено ниту еден денар државни пари туку, како статутарно така и одлучено од највисоките органи, беше донесен ставот дека „Меѓународен сојуз“ ќе се финансира со вмрежување на невладината организација, бизнис-секторот, општествени дејци, рече Бојан Јовановски-Боки 13 во своите завршни зборови во судскиот процес кој се однесува на работењето на оваа организација чиј претседател беше тој, а сега е првообвинет.
„Формирањето на ‘Меѓународниот сојуз’ доаѓа како резултат на низа активности од лична природа кои сум ги имал како јавна личност повеќе од 20 и неколку години. Поради тоа што во оваа судска постапка, тезата на обвинителството, агресивната пропаганда, како во овој судски предмет така и во ‘Рекет’ беше целосна дискредитација, контаминација на мојот лик и дело, она што е добро да биде претставено како лошо, она што вредело да биде како да не постои, а фактите да се заменат со шпекулации како што е обвинението”,
рече Јовановски.
Според Обвинителството, токму преку „Меѓународен сојуз“ двајца бизнисмени, Силјан Мицевски и Ардијан Амзоски, биле доведени во заблуда и измамени со проекти за изградба на Европски центар за возрасни лица и мобилни сервиси, па исплатиле речиси еден милион евра. Мицевски сума од 719 905, а Амзоски 233 821 евра.
Меѓутоа, како и во текот на судскиот процес така и во завршните зборови, Јовановски тврди дека не е така.
„Во оваа судница беа споменувани 719 000 евра, потоа 233 000 евра, па 350 000 евра.. И сите тие цифри беа споменувани и никаде не видовме докази за тие цифри. Видовме само празни зборови, а цифрите се атрактивни особено за формирање негативно јавно мислење кое живее врз целата тортура што сум ја доживеал изминатите година и половина – две. Таа тортура придонесе да се бранам и бранам како Дон Кихот, да се борам со ветерници“,
рече Боки.
Тој користеше и други метафори велејќи „ако не можете по магарето, удрете по самарот“, па порача: „Е сега самарот ќе ви каже нешто за магарето“, по што судијката го предупреди да се држи до завршните зборови и доказите што биле изведени.
Обвинетиот понатаму тврдеше дека проектите се реални и бизнисмените верувале во нив, па алудираше дека и Силјан Мицевски верува во проектот потсетувајќи дека бизнисменот пред судот рекол „ако Господ му даде здравје, сака да го изгради тој старски дом во Битола“, а потенцира и дека тој со други претставници на „Меѓународниот сојуз“ бил и на увид на локации каде што требало да се гради. Договорите, рече Јовановски, потпишани со двете фирми, „Пелистер“ и „Дрим билдинг“, претставувани од Мицевски и Амзоски, биле направени заеднички и доброволно потпишани, и ги негираше сведочењата на претставници на невладината организација дека не знаеле што потпишуваат обвинувајќи ги дека лажеле во своите сведочења.
Јовановски негираше и дека манипулирал оти ја имал и поддршката од владата предводена од Зоран Заев.
„Во обвинението се споменува злоупотреба на лажни факти од страна на мене како претставник или некакви евентуални помагачи и се споменуваат политичките власти, тогаш актуелната Влада како наводна поддршка и дека тоа е невистинит факт. Поддршката од Владата, од лицето Зоран Заев, тогашен премиер, јас лично ги имав од првиот ден од формирањето на „Меѓународниот сојуз“. Обвинителството во своите заврши зборови го крсти тоа како поттик од Зоран Заев. Не е мое да толкувам, но поттикот е голема форма, особено кога доаѓа од првоповикано лице кое ја извршува највисоката функција во државата. Дека Заев бил информиран и знаел за активностите, работењето, а особено за проектите за европски комплекс за возрасни лица и мобилен сервис е неспорен факт. Во овие заврши зборови ќе ја опишам улогата како на Зоран Заев така и на други од извршната власт, функционери од СДСМ, но и претставници на локалната самоуправа и градоначалници”,
рече Јовановски.
Според обвинетиот, Заев дал поддршка бидејќи тој лично му го презентирал проектот и ветил дека ќе се формира специјална комисија за проекти кои се за добро на државата. Јовановски, како доказ за поддршката на централната власт, наведе и дека бил потпишан меморандум за соработка со Министерството за транспорт и врски.
Обвинетиот посочи и дека двајцата бизнисмени имале поинтензивна комуникација со власта на СДСМ отколку тој лично, па лесно можеле да дојдат во информации дека се измамени.
„Верувајте дека провериле неколку пати пред да ги потпишат договорите”,
рече Јовановски, кој потсети дека Мицевски претходно бил градоначалник од редовите на СДСМ, а Амзоски е во роднински врски со Фијат Цановски, кој е коалициски партнер на социјалдемократите.
Ако биле измамени, рече Јовановски, тогаш зошто не пријавиле туку тоа го направија откако бил уапсен во „Рекет“.
„Тоа го направија поради силна пресија, агресивна пропаганда, поради најдиректно инволвираност и влијание на извршната власт, конкретно од УЈП, која додека тие даваа исказ кај Вилма Русковска, УЈП им влегува“,
рече Јовановски.
Тој рече дека е точно оти Амзоски му дал 350 000 евра во готовина, но и дека му ги вратил. А, тврдеше дека за парите не знаеле другите обвинети во случајот.
„Точно е дека Ардијан Амзоски дал 350 000 евра во готовина, дека има потпишано договори. Во овој момент, под целосна одговорност, ви тврдам дека ниту Христина која е обвинета дека знаела ниту мојот татко кој само еднаш беше во ‘Меѓународниот сојуз’. Не знаела ниту обвинетата Јасна Ерцеговиќ. За волја на вистината, знаеле политичари, но тоа не е обвинетата Фросина Ременски“,
рече Јовановски.
Тој праша и зошто овие пари не се споменуваат во обвинението туку само останатите две суми.
„Јас имам уште една многу важна работа да ја кажам зс ова недоречени обвинение. Обвинети сме за пари со што наводно сме ги измамиле и сме ги држеле во заблуда, не се споменуваат тие 350 000 евра. Зошто, не ми е јасно. Второ, за оваа работа, двете градежни фирми, Пелистер и Дрим Билдинг платија данок на државата која доби некаде околу 200 000 евра. Дали сега ќе бидат побарани парите назад? Ако ова е измама, а државата веќе си ги наплатил давачките за тие проекти”,
рече Јовановски.
Неговите завршни зборови се во тек.
Другите обвинети, адвокатите како и обвинителството, пак, завршните зборови ги дадоа на минатото рочиште што се одржа во средата (16 март).
Обвинението во предметот го застапуваше обвинителката Ивана Трајчева, на која на 31 јануари ѝ истече мандатот, па со оглед дека нејзиниот реизбор се случи вчера, во средата завршните зборови ги даваше обвинителот Трајче Пеливанов кој побара осудителна пресуда за сите обвинети.
„Обвинетите сериозно работеле да оставаат силен впечаток во јавноста. Неспорно е дека оваа дело обвинетиот Бојан Јовановски не можел да го реализира сам туку со влијание на другите обвинети. Неспорна е и улогата на обвинетата Ременски, таа знаела дека извршната власт не стоела зад договорите. Оштетените кажаа дека доколку не била обвинетата Ременски немале да ги склучат договорите“,
рече Пеливанов тогаш наведувајќи дека што се однесуваа на обвинетата Јасна Мандиќ, таа ги контактирала странките и знаела сè што се случува во невладината „Меѓународен сојуз“.
По завршните зборови, судскиот совет на чело со судијката Софче Гаврилова-Ефремова ќе закаже рочиште за изрекување на пресудата.
Во предметот, Бојан Јовановски – Боки 13 е првообвинет и се товари за делата измама и перење пари. Јасна Мандиќ-Ерцеговиќ и асистенката ХристинаБлажевска, пак, се обвинети за помагање во овие дела, а Фросина Ременски се товари за помагање во делото измама. Таткото на Боки, Миле Јовановски, пак, е петообвинет за помагање во перењето пари и за делото неовластено изработување, држење, посредување и тргување со оружје бидејќи при претрес во неговиот дом биле пронајдени три полуавтоматски пиштоли и муниција за кои немал дозвола. Како правно лице обвинета е и невладината организација.