Хрватскиот премиер рече дека она што со сигурност се знае е дека немало известување од двете членки на НАТО, Романија и Унгарија, низ чиј воздушен простор поминал дронот пред да се урне во Загреб
Премиерот на Хрватска Андреј Пленковиќ потврди дека во беспилотното летало што минатата недела се урна во Загреб имало некаков тип на експлозив, но дека истрагата ќе го открие за што се работи.
„Тоа беше експлозив, тип на бомба“,
изјави Пленковиќ на новинарите во Загреб по состанокот на раководството на Хрватската демократска заедница што тој го предводи.
Реагирајќи на изјавите на неколку воени експерти дека е невозможно да имало бомба на дронот, како што изјави министерот за одбрана Марио Баножиќ, Пленковиќ рече дека се што кажал министерот е точно.
На прашањето дали бомбата експлодирала, Пленковиќ рече дека „експертите ќе го кажат тоа кога ќе заврши процесот“ и додаде дека „имаше експлозија кога се урнал авионот“.
„Сè што слушнавте од Баножиќ и другите од Министерството за одбрана не беше погрешно“,
заклучи премиерот.
Тој рече дека вештаците кои учествуваат во истрагата на денешната средба со него биле „јасни и согласни“, но дека ќе остави неколку дена да излезат со прецизни информации, бидејќи истрагата се уште е во тек.
„Она што сè уште не знаеме е кој го испратил леталото, дали е поради грешка, саботажа, намерно“,
рече Пленковиќ и посочи дека одговор на овие прашања бараат заедно со партнери и сојузници, земји преку чии воздушниот простор прелетал дронот пред да се урне на зелена површина во близина на студентскиот дом во Загреб.
Тој нагласи дека продолжува интензивната комуникација со НАТО и најави дека кон средината на следната недела ќе отпатува за Шпанија поради дополнителни информации за леталото, каде што е сместено НАТО, чија задача е да го надгледува целиот воздушен простор.
Пленковиќ рече дека францускиот претседател Емануел Макрон изразил подготвеност француските авиони да помогнат во заштитата на хрватскиот воздушен простор и дека утре ќе посети француски носач на авиони во Јадранското Море, во близина на Дубровник. Тој рече и дека разговарал за помош со САД, а очекувал предлози од ресорното министерство како да се подобри системот за противвоздушна одбрана.
На прашањето дали хрватските радари можеле да го детектираат леталото претходно, Пленковиќ одговори дека истрагата ќе го утврди тоа, но дека авионот бил најдолго во унгарскиот воздушен простор, околу 40 минути, а многу кратко во Хрватска, седум минути. Тој додаде дека она што со сигурност се знае е дека немало известување од двете членки на НАТО, Романија и Унгарија, низ чиј воздушен простор поминал дронот пред да се урне во Загреб.