„За сè она што се однесува на рушење и кршење на територијалниот интегритет, Србија се приклучува, за она каде што се во прашање санкциите, Србија нема да се приклучи, барем додека можеме да издржиме уште малку, уште неколку дена додека сум де факто претседател на републиката. Е сега, откако ќе изберете (на изборите) некој друг, тоа е друга приказна“, рече Вучиќ не отстапувајќи од ставот оти Србија нема да воведе санкции против Русија
Србија ќе се приклучи кон сите одлуки на Генералното собрание на ОН во врска со нарушувањето на територијалниот интегритет на Украина, рече српскиот претседател Александар Вучиќ, но, додаде тој, ќе бидат отфрлени сите одлуки кои се однесуваат на санкциите против Русија.
„Вчера имавме девет гласања, во осум не се придруживме, на едно гласање се приклучивме. Денес имаме едно каде што ќе се приклучиме, па така секој ден, само информирајте ме на крајот за тие бројки. За сè она што се однесува на рушење и кршење на територијалниот интегритет, Србија се приклучува, за она каде што се во прашање санкциите, Србија нема да се приклучи, барем додека можеме да издржиме уште малку, уште неколку дена додека сум де факто претседател на републиката. Е сега, откако ќе изберете (на изборите) некој друг, тоа е друга приказна“,
изјави Вучиќ.
На прашањето за притисоците со кои се соочува Србија во однос на одбивањето да се приклучи кон санкциите против Русија, тој одговори дека тие се огромни.
„До доцна синоќа имав разговори со претставници на повеќе земји, а и денеска е така цел ден. Само толку за големото почитување на независноста и правото на другите земји да одлучуваат“,
кажа Вучиќ.
На прашањето како ги коментира барањата на поединци Србија, како и ЕУ, да ги забрани руските канали „Спутник“ и „Раша тудеј“, Вучиќ кажа дека некои во Србија сакаат да ги забранат сите медиуми што поинаку зборуваат.
Српскиот претседател Александар Вучиќ изјави и дека Хрватска има право да ја подигне борбената готовност на своите вооружени сили и додаде дека на Србија не и паѓа на памет да прави такви работи.
Вчера Европската комисија стави до знаење дека очекува од сите земји кандидати за членство во ЕУ, меѓу кои и Србија, да се усогласат со политиката на санкции против Русија, оти усогласувањето со одлуките и мерките во областа на надворешната политика на ЕУ е дел од процесот на зачленување во ЕУ.
„Знаеме дека единството и одлучноста да дејствуваме се нашата сила. ЕУ и партнерите преземаа силни мерки како одговор на дејствијата на Русија, а од земјите-кандидати како Србија се очекува да се усогласат со одлуките во областа на надворешната политика. Очекуваме сите земји кои сакаат поблиски односи со ЕУ да се усогласат со политиката на санкции“,
рекоа портпаролите на ЕК, Ана Писонеро и Ерик Мамер, на денешниот брифинг за новинари.
Претходно, српскиот претседател Александар Вучиќ изјави дека Србија нема да воведе санкции против Русија водејќи се од своите национални интереси, почитувајќи ги традиционалните пријателства и не заборавајќи што се случувало во 1999 и 2015 година.