Подољак за преговорите меѓу Русија и Украина: За жал, руската страна е се уште крајно пристрасна

Вториот круг од мировните преговори би требало да се одржи во наредните денови на полско-белоруската граница

Преговорите се тешки. Сепак, веќе без никакви задолжителни ултиматуми. За жал, руската страна се уште е крајно пристрасна во однос на деструктивните процеси што ги започна, објави денеска на Твитер советникот на украинскиот претседател и член на украинската делегација во преговоите со Русија Михаило Подољак.

Делегациите на Русија и Украина денеска во белорускиот пограничен град Гомел, одржаа прв круг од преговорите за прекин на конфликтот по што се вратија на консултации во своите главни градови.

Москва и Киев планираат „втор круг“ разговори за конфликтот, тоа го потврди за западните медиуми, член на украинската делегација.

Шефот на руската делегација во преговорите Владимир Медински изјави дека двете страни договориле разговорите да продолжат и втората рунда да биде одржана во следните денови на полско-белоруската граница.

„Најважно е дека се договоривме да продолжи преговарачкиот процес“,

изјави Медински по завршувањето на првата рунда преговори, што траеше пет часа.

Заврши првиот круг преговори меѓу Русија и Украина, следниот состанок би требало да се одржи на белоруско-полската граница

Украинската делегација ја предводеше министерот за одбрана на Украина Алексеј Резников, и во неа заедно со Подољак, се и лидерот на партијата Слугата на народот Давид Арахамија, шефот на украинската трилатерална контакт група Андреј Костин, пратеникот Рустем Умеров и заменик министерот за надворешни работи Николај Точицки.

Руската делегација пак, ја предводеше советникот на шефот на државата Владимир Медински, а во неа се и заменик министерот за надворешни работи Андреј Руденко, заменик министерот за одбрана Александар Фомин и претседателот на Комисијата за меѓународни прашања на руската Дума Леонид Слуцки.