Украинскиот претседател Володимир Зеленски, кој нема да присуствува на преговорите, вчера изјави дека не очекува тие да дадат некакви резултати
Белорусија соопшти дека место за одржување на разговорите меѓу украинската и руската делегација е подготвено, додека инвазијата на Москва врз западниот сосед влегува во петти ден.
Украина се согласи да испрати дипломати на локација во близина на украинско-белоруската граница, и покрај извештаите дека претседателот на земјата Александар Лукашенко е подготвен да испрати војници за да се приклучат на инвазијата.
„Местото за разговори меѓу Русија и Украина во Белорусија е подготвено, се очекува пристигнување на делегациите“,
соопшти белоруското Министерство за надворешни работи на социјалните мрежи објавувајќи слика од долга маса со руски и украински знамиња.
Анатолиј Глаз, портпарол на Министерството за надворешни работи на земјата, рече дека разговорите ќе започнат веднаш штом сите делегации ќе пристигнат на местото каде што ќе се одржи состанокот.
Украинскиот претседател Володимир Зеленски вчера изјави дека не очекува разговорите да дадат некакви резултати.
„Како и секогаш: Јас навистина не верувам во исходот од оваа средба, но нека се обидат“,
рече тој.
Амбасадорката на Украина во САД, Оксана Маркарова, вчера изјави дека Зеленски дефинитивно нема да биде дел од делегацијата во преговорите со Русија.
Таа за Си-ен-ен изјави дека украинскиот претседател останува да ја брани земјата. Го повика рускиот претседател да ја прекине војната и рече дека Украина ќе испрати делегација на преговорите. Амбасадорката додаде дека Украина е секогаш подготвена за разговори, но дека не е подготвена да се предаде.