Во однос на цивилните жртви Задоружњук наведува дека во близина на Нова Каховка, руските сили застрелале автомобил во кој патувало семејство и убиле пет лица, меѓу кои две деца. Тенкови на Русија, додава таа, пукаа и врз цивилен автобус, а било застрелано и семејство со три деца од кои едното дете, заедно со родителите, починало
Руските окупациски сили изведуваат моќни артилериски, воздушни и ракетни напади врз Украина, низ целата територија на Украина. Удираат по критичната инфраструктура – разнесоа гасовод во Харков, напаѓаат цивили, вели украинската амбасадорка во Северна Македонија, Наталија Задоружњук во денешниот брифинг со македонските медиуми.
Во обраќањето таа констатира дека не се остварија руските цели за 6 часа да ја освојат Украина, а Киев за 2 часа.
„Четврти ден по ред Украина продолжува херојски да ја брани својата земја и да се спротивставува на неколкукратно поголемата армија на непријателот. Пресметката на рускиот режим да ја земе Украина за 6 часа и Кијив за 2 часа не се оствари. Стоиме и ќе стоиме до крај“,
вели амбасадорката.
Во однос на цивилните жртви Задоружњук наведува дека во близина на Нова Каховка, руските сили застрелале автомобил во кој патувало семејство и убиле пет лица, меѓу кои две деца. Тенкови на Русија, додава таа, пукаа врз цивилен автобус.
„Диверзантска група застрела цело семејство со три деца. Родителите и едно од децата починаа. Другите две деца се во болница со тешки повреди. Тоа се случи во Киев на улицата Олена Телига, во близина на Бабин Јар, каде што пред 80 години нацистите убиваа цели семејства, вклучително и мали деца“,
вели украинската амбасадорка.
Од друга страна, пак, според нејзините тврдења, во текот на претходните три дена загубите на руската страна се бројат во 4 300 војници. Исто така, додава таа украинските вооружени сили заедно со граѓаните кои се обединија за да го запрат напредувањето на руските трупи успеале да уништат руски борбени единици, да ги повратат заробените градови, села и стратешки точки.
„Дипломатска војна: Русија има невиден пораз“
Задоружњук во обраќањето до македонската јавност констатира и дека ова е и дипломатска војна и оти во неа Русија има невиден пораз.
„Постапките на Путин ги одвратија од него дури и неговите најлојални сојузници во Европа. Не се работи само за Европа. Се создава јаз меѓу Русија и светот. Му благодариме на целиот свет за вистинската практична помош. Санкциите се исклучително строги, благодариме за оружјето, благодариме за сите рестриктивни мерки, затворањето на небото за руските авиони и воздушната комуникација со земјата окупатор. Русија е во изолација. Постои цивилизираниот свет и постои Русија, земјата агресор, која врши геноцид врз соседниот народ“,
вели амбасадорката.
Украина иницира исклучување на Русија од Советот за безбедност на ООН
Амбасадорката на Украина во денешниот брифинг информираше и дека претстои битка во Организацијата на Обединетите нации (ООН).
Станува збор за иницијатива на украинската страна за исфрлање на Русија од Советот за безбедност на ООН, каде Москва беше запишана во 1992 година.
„ООН се најде на работ на колапс бидејќи тоа што постојана членка на Советот за безбедност на ООН врши отворена, апсолутно непредизвикана и однапред подготвена агресија врз соседна држава, ја уништува суштината на организацијата“,
вели Задоружњук.