Рускиот преговарачки тим уште од утринава се наоѓа во белорускиот град Гомељ, а од Министерството за одбрана порачаа дека ја очекуваат и украинската делегација. Меѓутоа, Зеленски во видеообраќање што го имаше во раните утрински часови порача дека неговата земја е подготвена за мировни преговори со Русија, но не во Белорусија
Украинскиот претседател Володомир Зеленски преку социјалните мрежи објави дека разговарал со белорускиот лидер Александар Лукашенко, но не даде никакви детали за што зборувале.
Рускиот државен медиум РТ, пак, објави дека Украина се предомислила и се согласила да испрати преговарачки тим во Белорусија.
„Киев ги потврди планираните разговори во регионот на Гомељ, кој е близу и до границата на Русија и до границата на Украина“,
изјавил шефот на рускиот преговарачки тим, Владимир Медински, пренесува РТ.
Медински, кој е помошник на Владимир Путин и поранешен министер за култура, додал дека двете страни сега одлучуваат околу логистиката и точната локација каде ќе се одржат преговорите, со „максимална безбедност“ за Украинците.
„Гарантираме дека рутата за патување ќе биде 100 отсто безбедна. Ќе ја чекаме украинската делегација“,
вели главниот руски преговарач во изјава што ја пренесуваат руските медиуми.
Информација дека Украина се согласила да оди на преговори во Белорусија, засега не е објавена во поголемите западни медиуми, како „Си-ен-ен“ и „Би-би-си“.
Рускиот преговарачки тим уште од утринава се наоѓа во белорускиот град Гомељ, а од Министерството за одбрана порачаа дека ја очекуваат и украинската делегација.
Меѓутоа, Зеленски во видеообраќање што го имаше во раните утрински часови порачува дека неговата земја е подготвена за мировни преговори со Русија, но не во Белорусија, од каде руски трупи се движеа кон украинска територија за време на инвазијата изминатите денови.
Зеленски наведе други градови во пет држави како алтернатива каде може да седнат на преговарачка маса и тоа: Варшава (Полска), Братислава (Словачка), Истанбул (Турција), Будимпешта (Унгарија) или Баку (Азербејџан). Украинскиот претседател порача дека можни се и други локации, но јасно стави до знаење дека Украина не го прифаќа рускиот избор тоа да биде Белорусија.