Министерот за економија вели дека од замрзнувањето на цените на основните прехранбени продукти поголемиот товар паднал врз производителите, отколку врз трговците. Во време на пандемија – во 2020 година, како што соопшти, дел од супермаркетите имале нето профит од три до 8,5 милион евра
Од 1 март, кога ќе стапи во сила одлуката за ограничување на маржите, очекувањата се дека ќе се стабилизира пазарот, изјави вечерва министерот за економија, Крешник Бектеши, кој не верува дека ќе има нов ценовен шок.
„Не очекуваме големо намалување на цените. Ако останат истите цени на суровините, тогаш, согласно одлуката, очекуваме да има намалување од пет до 10 проценти на постоечките цени. Во случај да се зголемат цените на суровините, тогаш минимум што може да направиме е да имаме стабилизација на цените“,
рече Бектеши во „Топ тема“ на Телма.
Тој посочи дека од мерката за замрзнување на цените на основните прехранбени продукти поголемиот товар паднал врз производителите, отколку врз трговците на големо и мало. Во време на пандемија, поточно во 2020 година, како што соопшти министерот, дел од супермаркетите во земјава имале нето профит кој се движел од три до 8,5 милиони евра.
„Треба да се има предвид дека во време на пандемија, сите тие беа директно поддржани од страна на државата. Ние секогаш повикуваме на солидарност – не секогаш товарот да паѓа на граѓаните и тие да плаќаат повисоки цени, а одредени компании да не намалат ниту еден процент од маржите. Дополнително на тоа, на товар на производителите, на некој начин вештачки да ги доведуваат во позиција да мора да ги зголемат давачките“,
истакна Бектеши.
Одлуката за ограничување на маржите важи до крајот на мај бидејќи дотогаш, како што рече Бектеши, се очекува да биде донесен законот за нефер трговски пракси со кој меѓу другото се предвидува категоризација на супермаркетите. Законот, според министерот, ќе биде донесен во консултација со сите засегнати страни.