Директорот на Центарот за управување со кризи (ЦУК) Стојанче Ангелов утрово го посетил Секторот 112 во Центарот за управување со кризи.
Оттаму информираат дека дежурниот сменоводител и примателите на итни повици го запознале Ангелов со тековната работа, како и со почетните проблеми со коишто се соочува новиот Сектор 112.
ЦУК информира дека во петокот, кога бројот за итни повици 112 беше пуштен во употреба, биле примени околу 600 повици, вчера околу 430, а во текот на ноќва до 8 часот биле примени 76 повици. Тоа покажува дека во текот на изминатиот викенд над 1 000 граѓани побарале помош од новоотворената линија.
Линијата за итни повици – 112, како единствен повикувачки број кој важи на целата територија на Европската Унија, од петокот започна да функционира и во земјава, за почеток само во Скопје.
Наместо досегашните 192, 193, 194 и 195, односно полиција, брза помош, противпожарна единица или Центарот за управување со кризи, граѓаните со едноставно вртење на 112 можат да ја добијат која било услуга, доколку имаат каков било итен случај и потреба од државата.
