Американскиот претседател и новиот германски канцелар ќе разговараат за обврската да продолжат обидите за одвраќање на Русија од агресија врз Украина
Американскиот претседател Џо Бајден ќе го прими новиот германски канцелар Олаф Шолц на 7 февруари, соопшти денеска портпаролката на Белата куќа, Џен Псаки.
„Тие ќе разговараат за обврската да продолжат обидите, преку дипломатски пат и со заеднички напори, за одвраќање на Русија од агресија врз Украина“,
рече таа во соопштение.
Во Париз вчера се одржа состанок меѓу Русија и Украина со француско-германско посредство за решавање на украинската криза, а во тој состав е најавена нова средба за две недели во Берлин. Состанокот во Париз се одржа откако САД и НАТО писмено одговорија на барањата на Русија за смирување на тензиите. Русија распореди десетици илјади војници на границите на Украина во последните месеци, што предизвика страв од инвазија. Иако Москва негира каков било таков проект, Кремљ инсистира на писмени гаранции за неговата безбедност, вклучително и ветување дека Киев нема да се приклучи на НАТО.