Груби е убеден дека двете земји ќе успеат да најдат решение во првите шест месеци од годинава
Првиот вицепремиер и министер за политички систем Артан Груби вели дека граѓаните немаат никаква основа за загриженост во однос на преговорите што со Бугарија ги води министерот за надворешни работи Бујар Османи. Секој договор што евентуално би бил постигнат, нагласува, треба да биде претставен и прифатен од граѓаните. Ние, како што додава, се солидаризираме со нашите сограѓани Македонци и апсолутно се постројуваме со нив во одбрана и на идентитетот и на јазикот и на сите други чувствителни прашања.
„Жалам што колегата Димитров дознал дека не му верува на Османи на крајот на својот мандат. Можеби би било добро тоа да го кажеше на почетокот и да пристапиме кон градење на таа доверба меѓу Османи и Димитров. Но, јас сум убеден дека граѓаните немаат никаква основа да имаат недоверба, ниту во Османи ниту во Владата, затоа што се е транспарентно и кој било договор да биде постигнат ќе мора да биде претставен пред граѓаните и да биде прифатен од нив“,
рече Груби прашан за коментар во врска со ставот на вицепремиерот за европски прашања Никола Димитров дека не верува во Османи бидејќи, според него, тој преговара за постигнување договор со Бугарија по секоја цена.
Ние, рече Груби, застапуваме став дека се солидаризираме со нашите сограѓани Македонци и апсолутно се постројуваме со нив во одбрана и на идентитетот и на јазикот и на сите чувствителни прашања.
„Јас имам апсолутна доверба во министерот за надворешни работи Бујар Османи, кој најсовесно ја врши својата работа и најодговорно пристапува кон преговорите со Република Бугарија“,
рече Груби.
Тој е убеден дека двете земји ќе успеат да најдат решение во првите шест месеци од годинава.
„Во очекување сме на посетата на новиот бугарски премиер Кирил Петков, како и на одржување на заедничка владина седница со нашиот сосед во текот на овој месец“,
истакна Груби.
На истата тема медиумите коментар побараа и од министерката за образование и наука Мила Царовска.
„Јас не би коментирала изјава на вицепремиер од нашата Влада. Сметам дека секој го кажува својот став и вие како медиуми го пренесувате на начин како што тоа е кажано“,
рече кусо Царовска.
Таа заедно со Груби и градоначалникот на Општина Бутел, Дарко Костовски, беа во посета на локацијата во населба Визбегово во Општина Бутел, каде што со средства на МОН започна изградбата на ново основно училиште.