Македонските позиции дадени како наш одговор по однос на темите што се предмет на разговори со Бугарија, за кои јавноста е добро запознаена, се изградени низ сеопфатен консултативен процес и работни состаноци во кои Никола Димитров имаше активна и суштинска улога и за кои придонесе со своите ставови, реагираат од кабинетот на Заев
Ако Никола Димитров е против што било во врска со македонските позиции во преговорите со Бугарија, чесно е да каже зошто бидејќи во спротивно останува само впечатокот дека тоа што нема да е дел од идната влада е причина за неговите изјави, реагираат од кабинетот на премиерот во заминување Зоран Заев.
Оттаму се огласија откако вицепремиерот за европски прашања пред заминување од функцијата денеска одржа прес-конференција на која рече дека не се повлекол сам од идната влада. Според неговите изјави, некои сака да го тргне настрана затоа што му сметаат неговите ставови за Софија. Исто така, Димитров кажа и дека изминатата година водел борба во Владата околу прашањата со Бугарија, која битка ескалирала двапати, како и дека нема доверба во шефот на дипломатијата Бујар Османи, кој сака постигне договор со Софија по секоја цена.
Од кабинетот на Заев во реакцијата порачуваат дека Димитров се согласил со македонските позиции и имал сериозен удел во нивното создавање, како и дека Северна Македонија има јасни позиции, а македонскиот идентитет и јазик воопшто не се тема на разговор.
Реакција од кабинетот на Заев за изнесените ставови од Никола Димитров ја пренесуваме во целост:
Северна Македонија има јасни позиции во разговорите со Бугарија, изградени со целосно владино единство и испратени како одговор од нашето МНР до бугарското МНР.
Македонскиот идентитет и македонскиот јазик воопшто не се тема на разговор помеѓу нас и Бугарија.
Македонските позиции дадени како наш одговор по однос на темите кои се предмет на разговори со Бугарија, за кои јавноста е добро запознаена, се изградени низ сеопфатен консултативен процес и работни состаноци во кои Никола Димитров имаше активна и суштинска улога и за кои придонесе со своите ставови, а пак таквите наши позиции се целосно на линија на португалскиот предлог кој беше предлог и на словенечкото претседателство, но и целосно во согласност со Резолуцијата усвоена во Собранието на Северна Македонија.
Со македонските позиции во овие преговори се согласи и Никола Димитров, впрочем тој имаше сериозен удел во создавањето на тие наши позиции, низ процесот кој го водеше министерот за надворешни работи, Бујар Османи.
Доколку Димитров е против што било од позициите кои сме ги изградиле заедно, чесно е заради народот да го каже тоа и да објасни зошто, бидејќи во спротивно останува само впечатокот дека неговото неучество во идната влада е причина за ваквите неточни и шпекулативни јавни манифестации со цел од напред да се става товар на недоверба во владата.
*Поврзани вести:
Димитров: Коалицијата не прифати да бидам премиер по Заев
Немам целосна доверба во министерот Османи во однос на преговорите со Бугарија, вели Димитров