На професионалниот војник И.Ч. (44) кој извршувал должности во водот за обезбедување во командата на КФОР-запад во Пеќ, во текот на попладневните часови му се слошило, по што веднаш му била пружена прва помош од страна на надлежната санитетска служба во состав на контингентот, а потоа со воен хеликоптер е пренесен во Приштина
Професионален војник кој беше во состав на контингентот на Армијата на Република Северна Македонија во мисијата КФОР, вечерва почина во болница во Приштина, соопшти Генералштабот на Армијата.
На професионалниот војник И.Ч. (44) кој извршувал должности во водот за обезбедување во командата на КФОР-запад во Пеќ, во текот на попладневните часови му се слошило, по што веднаш му била пружена прва помош од страна на надлежната санитетска служба во состав на контингентот.
Со воен хеликоптер во придружба на воен медицински персонал бил упатен во болница во Приштина како најблиска здравствена установа, каде што бил реанимиран, но по кратко време е констатирана смрт за која, според првичните наоди, причина најверојатно е срцев удар.
„Од страна на Генералштабот по добивање на првичните информации со преземање на сите потребни процедури, трагичната вест е соопштена на неговите најблиски и во моментот во координација со сите надлежни институции се преземаат сите неопходни мерки за пренесување на посмртните останки на нашиот припадник во неговото место на живеење. По пристигнувањето на телото на нашиот починат мировник, погребот ќе биде со сите воени почести а во координација со неговата фамилија во време и место кое ќе биде одредено“,
се наведува во соопштението од ГШ на Армијата на Република Северна Македонија.