Пратеничката на ВМРО-ДПМНЕ смета дека не треба да се прекинува утрешната седницата за пратенички прашања откако ќе биде констатирана оставката на премиерот, затоа што владата во оставка останува на должност до избор на нова влада
Пратеничката на ВМРО-ДПМНЕ, Гордана Силјаноска, вели дека е крајно невообичаено на седница за пратенички прашања да се констатира оставка и да им се оневозможи на пратениците да им поставуваат прашања на министрите.
Коментирајќи ја оставката што премиерот Зоран Заев ја поднесе попладнево во парламентот, Силјаноска посочи дека, според Уставот, владата во оставка останува на должноста до избор на Владата.
Таа нагласи дека во Уставот постои термин „влада во оставка“, која, како што рече, се уште одговара пред парламентот.
Силјановска посочи дека од јуни во Собранието не е одржана седница за пратенички прашања.
Оставката на Заев попладнево стигна кај претседателот на парламентот, Талат Џафери. Премиерот во заминување во дописот до Џафери наведува дека нема да ја искористи можноста усно да ја образложи оставката пред пратениците.
Се очекува оставката да биде констатирана во почетокот на утрешната нова собраниска седница, на која треба да се поставуваат пратенички прашања.