Премиерот во заминување го известил собранискиот спикер дека нема да ја образложи усно оставката пред пратениците
Новата влада би можела да биде избрана до крајот на следниот месец, доколку се чекаат последните рокови, вклучително со терминот во кој треба да се одржи собраниската седница. Доколку процесот оди побрзо и се скратат роковите, изборот на новата влада би можел да заврши и кон средината на јануари
Оставката на досегашниот премиер Зоран Заев стигна на масата на спикерот Талат Џафери и се очекува уште утре да биде констатирана, на почетокот на новата собраниска седница (за пратенички прашања).
Иако собранискиот Деловник предвидува можност премиерот да ја образложи оставката пред пратениците, Заев го известил Џафери дека нема да ја искористи таа можност.
Сепак, во известувањето до Џафери, Заев подетално се осврнува на причините за неговото заминување од кормилото на „Илинденска“.
Текстот на оставката на Заев го пренесуваме во целост:
„Оваа моја одлука ја презедов како логичен чекор кој произлегува од исходот на локалните избори и како израз на преземената одговорност за изборните резултати. Резултатите на последните избори, иако беа локални, за политичкиот момент во кој се наоѓа земјата имаа и национална политичка тежина. Во вакви услови, за мене лично и за мене како премиер, заради политиките во кои верувам, заради демократските и европските вредностите во кои верувам, политички неодговорно и неоправдано пред мојот народ и мојата земја би било јас лично да продолжам да ја водам Владата на евроатлантскиот пат. Сметам дека друг премиер од редовите на СДСМ тоа ќе може да го оствари на подобар начин, со успех и за граѓаните и за државата.
Со мојата оставка со која ја преземам одговорноста сакам да оставам пример за да се препознаваат доблесните одлуки кога тоа е неопходно и со тоа да дадам уште еден придонес во јакнење на демократскиот капацитет на народот, но исто така и на идните лидери за да бидат свесни за својата граѓанска должност кога ја преземаат грижата за својата земја. Затоа што демократијата значи и одговорност.
Ова го направив и за да може да продолжи да се развива нашата западно-европска идеја и прогресивниот концепт во земјата да си создаде услови за сопствено освежување и зајакнување, а со тоа да не се дозволи да биде поразен на национално ниво – за да можат токму тие современи демократски сили да опстојат и да продолжат да се борат за напредокот на Северна Македонија – во име на слободата, демократијата, различностите, добрососедството, НАТО и за полесно и побрзо да ги почнеме преговорите со ЕУ.
Ми беше огромна чест што можев да служам и што ја имав довербата на мнозинството од народот во изминатите четири години. Особено сум горд на тоа што поддршката стигаше од сите етнички заедници, од целиот наш мултиетнички народ и што големата идеја за нашето ’Едно општество за сите’, денес, полека, но сигурно почнуваат да ја прифаќаат и нејзините противници.
Во сите предизвици има периоди на мир меѓу две битки, денови кога ентузијазмот ослабнува, кога се соочуваме со неисполнување на тоа што се очекува и што е договорено. Но едно е сигурно дека никогаш нема да има денови, ниту ситуации, кога тие моменти биле причина да се откажеме од остварувањето на нашата голема цел што си ја поставивме со сите наши граѓани само пред четири години.
За време на моите мандати како премиер, донесовме историски одлуки поради кои Северна Македонија наместо како „поранешна република“, без свое трајно и суверено потврдено место во друштвото на народите, го доби тоа што ѝ припаѓа според нејзиното достоинство и историски заслуги. Тие одлуки овозможија Македонците и македонскиот јазик да бидат потврдени од целиот свет, а овој пат и од нашиот сосед и пријател, Република Грција. Сметам дека со тоа обезбедивме траен мир, безбедност, сигурност и трасиран пат за економски добробит на народот.
Сакам да им се заблагодарам на пратениците во Собранието, овој и претходниот состав, на членовите на двата состави на Владата за време на моите мандати и на граѓаните на нашата држава. Прво, за изразената доверба на парламентарните избори, потоа и за поддршката за мојот избор за премиер со што прифатија дека нема такви прашања за кои нема одговор додека постои волја за нивно решавање и додека постојат взаемни односи на искрена доверба и пријателство. Времето ќе покаже дека оваа моја одлука е во согласност со мојата определба да бидам политичар кој презема одговорност за да бидат донесени тешки, но историски важни одлуки за добрата и сигурна иднина на нашиот народ и на државата, без притоа грижата за личниот политички рејтинг да ја ставам пред државните интереси“.
Се очекува оставката на Заев да биде констатирана во почетокот на утрешната (нова) седница на Собранието (за пратенички прашања). На истата седница треба да биде констатирана и оставката на досегашниот потпретседател на парламентот од редовите на Беса, Фадил Зендели, откако неговата партија замина во опозиција, а нов партнер во власта стана Алтернатива.
Од утре почнуваат да течат роковите од: 10 дена во кои шефот на државата треба да му го даде мандатот за формирање влада на новиот мандатар и од 20 дена во кои тој би требало да ги состави списокот на министри и програмата на владата и да ги испрати во Собранието.
Според тоа, новата влада би можела да биде избрана во парламентот до крајот на следниот месец, доколку се чекаат последните рокови, вклучително со терминот во кој треба да се одржи собраниската седница. Доколку процесот оди побрзо и се скратат роковите, изборот на новата Влада би можел да заврши и кон средината на јануари, со оглед на тоа што коалициските партнери веќе ги имаат договорено повеќето детали.
Заев денеска присуствуваше на редовното годишно обраќање на претседателот Стево Пендаровски пред Собранието. Неколку часа подоцна неговата оставка стигна во парламентот, каде што тој утре нема да биде присутен за да ја образложи пред пратениците.
Ноќта на 31 октомври, по вториот круг од локалните избори, Заев најави оставка и од лидерската позиција СДСМ и од премиерското место. Прво ја ефектуираше оставката на партиската функција, така што СДСМ неодамна доби нов лидер – Димитар Ковачевски, кој наскоро ќе го наследи Заев и на премиерското место.