Постои декларативен притисок и на зборови, тоа го гледаме сите, но сериозен политички притисок врз Бугарија не гледаме во изминативе години. Затоа можам да се согласам со Димитров дека какво било решение треба да дојде и да се усвои во македонското Собрание, но прашањето што ми се поставува е дали ќе има какво било решение бидејќи нема притисок врз другата страна, рече во дебата Александар Николоски од ВМРО-ДПМНЕ
Вицепремиерот задолжен за европски прашања Никола Димитров смета дека секое решение до кое би дошле Северна Македонија и Бугарија, а кое би овозможило кревање на бугарското вето за почеток на преговори на земјава со ЕУ, би требало да дојде пред пратениците во Собранието на верификација. Со ова се согласија и пратениците од опозицијата и власта кои денеска на седница на собранискиот Национален совет за евроинтеграции расправаа за заклучоците на Советот за општи работи на Европската Унија за проширувањето.
„Мое лично уверување е дека ова прашање е прашање на нацијата и државата и ги надминува интересите на една или на друга влада или на една или друга опозиција. Со оглед на тоа што во коалицискиот договор на новата бугарска влада проминентно место има и Собранието во Софија каде што секое евентуално решение ќе оди на дебата, а исто така имајќи ја предвид и резолуцијата донесена во нашето Собрание каде се утврдуваат црвените линии по ова прашање од највисок национален интерес, мислам дека има логика и ќе го зголеми легитимитетот доколку и ние чекор по чекор изградиме политичка атмосфера во насока дека какво било решение, што мора да биде европско и достоинствено, ќе дојде на дебата и на некаква валидација во нашиот Парламент“,
рече Димитров.
Соња Мираковска од НСДП се согласи со вицепремиерот Димитров, и додаде дека во решавањето на спорот со Бугарија од ЕУ се бара да бидат изречно почитувани човековите права и правото на самоопределување. Права, кои, како што нагласи пратеничката, нам ОН како и на сите други нации им ги дава. Според неа, само на тој начин може да се реши спорот.
„Тоа е единствениот начин да почнеме по патот кон Европската Унија. Мислам дека можеме, но на тој пат, да ве замолам да бидеме единствени. Се согласувам со она што го кажа Димитров, а и дел од колегите од опозицијата – да, овде во Собранието ќе мора да се расправа за чекорите кои се прават и тука треба да се донесат важните одлуки. Процесот треба да биде потранспарентен, се разбира онолку колку се може и пратениците треба да знаат што се случува“,
рече Мираковска.
Претседателот на Националниот совет за евроинтеграции Александар Николоски, кој е пратеник од ВМРО-ДПМНЕ, во расправата истакна дека недостига здрава дебата и здрав консензус меѓу политичките партии, дека се злоупотребува процесот на пристап на земјава во ЕУ од страна на власта.
„Бесрамно тој процес се злоупотребува континуирано со цел одредени политички структури да останат на власт, но и да се отворат нови процеси како ’Отворен Балкан‘, кои имаат пред себе многу прашалници за кои нема одговори, а се однесуваат на иднината на државата и на регионот и стабилноста на границите“,
рече Николоски.
Во врска со спорот со Бугарија, Николоски нагласува дека има впечаток оти не постои посериозен притисок врз Бугарија.
„Постои декларативен притисок и на зборови, тоа го гледаме сите, но, сериозен политички притисок врз Бугарија не гледаме во изминативе години. Затоа можам да се согласам со Димитров дека какво било решение треба да дојде и да се усвои во македонското Собрание, но, прашањето кое ми се поставува е дали ќе има какво било решение бидејќи нема притисок врз другата страна. Ако се очекува дека решението ќе е само со конкретен притисок со нашата страна мислам дека тоа се нереални очекувања“,
рече Николоски.
Пратеникот Антонио Милошоски смета дека земјава и со последните заклучоци на Советот на ЕУ не го добила она што го заслужува од 2009 година. Ако пред неколку години изговор беше соседна Грција, нагласи тој, сега изговор е соседна Бугарија.
„Иако се смета дека ова не е координирано или дека се самостојни потези на поединечни соседни земји членки, сметам дека тоа е во една добра дискретна координација со повлијателни актери во ЕУ, затоа што процесот на проширување очигледно е дека во последните 10 години не е, барем не за сите, приоритетен или суштински процес на ЕУ“,
рече Милошоски.
Тој не е оптимист дека нешто ќе се промени во оваа насока во наредната година. Затоа, нагласи пратеникот, сите заедно треба да работиме да се исполнат реформите и да се постигне напредок, за кога ќе нема политички опструкции земјава да ги почне преговорите без кој било да има реална замерка дека ништо не сме исполниле од условите.
Пратеникот Арбер Адеми од ДУИ смета дека решение за спорот со Бугарија може да има, ако има волја на двете страни.
„Мојот став е дека со политичка волја на двете страни, билатералниот спор со Бугарија би можел да се реши доколку ги надминеме разликите за време на француското претседавање со Унијата кое почнува во јануари следната година“,
рече Адеми додавајќи дека тоа не би било во интерес само на нашата земја, туку и на Европската Унија.
Тој побара заедно да се работи на овој процес, а не тој да се претвора во политикантство и можност за добивање политички поени.
Земјите членки на ЕУ на заседанието на Советот за општи работи (ГАК) на 14-ти овој месец, не постигнаа договор за одржување на првите меѓувладини конференции со Северна Македонија и Албанија до крајот на оваа година и покрај јавно изнесените надежи на словенечкото претседателство за старт на преговорите со двете земји годинава. Во заклучоците од состанокот изостана временската одредница „до крајот на годината“, како рок за одржување на првите меѓувладини конференции со Скопје и Тирана.