Европското регулаторно тело наведува дека најчестите несакани ефекти кај децата се истите како и кај возрасните односно болка, црвенило и оток на местото на апликација на вакцината, замор, главоболка и болка во мускулите
Европската агенција за лекови (ЕМА), која е регулаторно тело за лекови на ЕУ, ја одобри употребата на вакцината на „Фајзер“ и „Бионтек“ за деца на возраст од пет до 11 години.
Оваа вакцина веќе е одобрена за децата од 12 години нагоре како и кај возрасните. Кај децата од пет до 11 години, дозата ќе биде послаба односно 10 микрограми во споредба со дозата што се користи за останатите – 30 микрограми. Ќе се дава во две дози во период од три недели.
Испитувањата на употребата на вакцината кај оваа категорија покажаа дека од 1 305 деца кои биле вакцинирани само три потоа се заразиле со ковид-19, во споредба со 16 заразени од 663 деца кои примиле плацебо.
„Тоа значи дека во оваа студија вакцината била 90,7 отсто ефикасна во превенција на симптоматски ковид, иако реалната стапка на ефикасност би можела да биде помеѓу 67,7 и 98,3 отсто“,
пишува во соопштението на ЕМА.
Европското регулаторно тело додава и дека најчестите несакани ефекти кај децата се истите како и кај возрасните односно болка, црвенило и оток на местото на апликација на вакцината, замор, главоболка и болка во мускулите.
ЕМА соопшти дека почнала да ја проценува употребата на вакцината кај децата од пет до 11 години кон средината на октомври, откако неколку недели претходно даде зелено светло за употреба на трета доза на вакцината на „Фајзер“/„Бионтек“ кај полнолетната популација.