Околу 15 минути по стартот на прес-конференцијата во неделата, додека Мицкоски одговараше на новинарски прашања, а зад него стоеја новоизбраните градоначалници, Папазов колабираше, при што беше задржан од сопартијците кои беа во негова близина и беше спуштен на земја
Градоначалникот на Кочани Љупчо Папазов доцна попладнево добил позитивен резултат на ПЦР-тестот за ковид-19 што го направил во кочанскиот Центар за јавно здравје.
Во текот на денот, на негово барање му бил направен амбулантски преглед, откако се посомневал за здравствената состојба по претходниот позитивен резултат од брзиот антигенски тест. Подоцна му е извршено снимање на томографот во штипскиот ковид центар, но не е задржан на болничко лекување.
Во кусата телефонска изјава за МИА, Папазов потврди дека се чувстува добро, без видливи симптоми на ковид-19, иако и двата теста го потврдиле присуството на коронавирусот.
Папазов вчера ја презеде градоначалничката функција, но од денеска е на боледување и работните обврски ќе ги координира од домашна изолација.
На Папазов, му се слоши за време на прес-конференцијата на партискиот лидер Христијан Мицкоски пред главниот штаб на партијата во неделата.
Околу 15 минути по стартот на прес-конференцијата, додека Мицкоски одговараше на новинарски прашања, а зад него стоеја новоизбраните градоначалници, Папазов колабираше, при што беше задржан од сопартијците кои беа во негова близина и беше спуштен на земја.
Мицкоски ја прекина прес-конференцијата, а на новинарите само им кажа дека градоначалникот е добар. Набргу, Мицкоски објави и заедничка фотографија со него, порачувајќи дека е во ред и оти интензивниот период досега си го зема данокот.