Речиси 5 000 посетители вчера го посетиле павилјонот на Северна Македонија на „Дубаи Експо 2020“, на кој се претставени културните посебности, туристичките атракции, богатото историско наследство, како и етничката разновидност на нашата земја, соопшти Министерството за надворешни работи.
Земјава оваа година учествува на овој светски настан со слоганите „Дом на секој чекор” и „Нови можности”. Во павилјонот се изложени теракоти, артефакти, традиционални носии, промотивни материјали и видеопрезентации.
„Многубројните посетители од над 190 земји во светот имаат уникатна можност директно да се запознаат со културата и традицијата на нашата држава, како и со природните богатства и туристичкиот потенцијал. Посебен фокус е ставен на можностите за економска и трговска соработка, како и инвестицискиот и бизнис потенцијал на земјава, поради што поставени се и дополнителни информативни панели за слободните економски зони, иновациите, земјоделството, енергетиката и туризмот“,
информира МНР.
МНР посочува на придобивките од учеството на земјава на светската манифестација кои овозможуваат подигнување на видливоста на земјава во регионот на Блискиот Исток, како и во светски рамки, зголемување на бројот на странски туристи, креирање мрежа на бизнис контакти и можности за зголемување на економската соработка со голем број земји од различни региони во светот.