Централните настани по повод Денот на востанието ќе бидат во Прилеп, а празникот ќе биде одбележан и во Скопје и во Куманово
Во Прилеп вечерва почнува одбележувањето на 11 Октомври – Ден на народното востание и 80-годишнината од почетокот на народно-ослободителната војна.
Според програмата, во 18 часот на плоштадот „Методија Андонов-Ченто“ ќе се обратат премиерот Зоран Заев, претседателот на Главниот одбор на Сојузот на борците од Народно-ослободителната антифашистичка војна од 1941-1945, Никола Стојановски и градоначалникот на Прилеп, Илија Јованоски.
Празничната програма потоа ќе продолжи со настап на воениот оркестар на Армијата и ќе заврши со традиционалниот импровизиран напад на градот, како потсетување на 11 октомври 1941 година.
Свеченостите по повод 11 Октомври продолжуваат утре, кога во Прилеп, во 9 часот, делегации на државниот врв, општествено-политички организации, Армијата, дипломатскиот кор и на гости од странство ќе положат цвеќе пред спомениците на Методија Андонов Ченто, Кузман Јосифовски Питу и на спомен обележјата во Алејата на народните херои, пред споменикот „Жена борец“ и на Могилата на непобедените.
На Могилата на непобедените е предвидена свечена празнична програма и обраќања на претседателот на државата Стево Пендаровски, на градоначалникот на Прилеп, Илија Јованоски и на претседателот на Општинскиот одбор на борците од Прилеп, Круме Соколоски.
Празникот ќе биде одбележан и во Скопје и во Куманово.
Во Скопје, чествувањето ќе започне во меморијалниот комплекс „Партизански гробишта“ во Бутел во 09:30 часот. На свеченостите во Скопје ќе се обратат потпретседателката на Главниот одбор на Сојузот на борците од НОАВМ 1941-1945, Елена Ј. Грујовска, градоначалникот на Град Скопје, Петре Шилегов, првиот заменик-претседател на Владата и министер за политички систем и односи меѓу заедниците Артан Груби и потпретседателот на Собранието на Република Северна Македонија Горан Мисовски.
Во Куманово, пред Спомен костурницата во градот, цвеќе ќе положат министерот за внатрешни работи Оливер Спасовски и заменик-министерот за политички систем и односи меѓу заедниците Илхан Рахман.