При доволно топло време кога не е потребно никакво греење, нагласуваат од РКЕ, ќе се прекине испораката на топлинска енергија, а веднаш по намалувањето на надворешните температури под определените вредности, греењето повторно ќе се вклучи
Регулаторната комисија за енергетика и водни услуги (РКЕ) информира дека од денеска започнува испораката на топлинска енергија до потрошувачите поврзани на системите за централно греење во Скопје, што се врши по строго утврдени правила во зависност од атмосферските услови и надворешните температури.
„Според регулативата, доколку надворешните температури се пониски се испорачува поголемо количество топлинска енергија и обратно, така што корисниците имаат обезбеден комфор и загреани домови согласно стандардите, односно температури во домовите не пониски од 20 +1 степен Целзиусов. Во исто време, со овие правила на испорака се обезбедува оптимална потрошувачка на топлинска енергија и минимални трошоци за греење на потрошувачите“,
велат од РКЕ.
При одредени атмосферски услови на доволно топло време кога не е потребно никакво греење, нагласуваат, ќе се прекине испораката на топлинска енергија, а веднаш по намалувањето на надворешните температури под определените вредности, греењето повторно ќе се вклучи.
„Оваа година грејната сезона започнува пред официјалниот старт на грејната сезона – 15 октомври, поради тоа што просечнaта дневна температура за следниот ден е пониска од 12 степени, заради што РКЕ даде одобрение за испорака на топлинска енергија за да се обезбеди потребниот комфор на потрошувачите“,
посочуваат од регулаторното тело.