Балканот, географски, не е на европската периферија и затоа не смее да биде ниту на периферијата на политичкото внимание, истакнал шефот на македонската дипломатија на средбите во Берлин
Подготовките пред Самитот ЕУ – Западен Балкан во Брдо кај Крањ, надминувањето на разликите со Бугарија, како и најновите внатрешно – политички состојби во нашата земја се темите кои биле во фокусот на разговорите на шефот на македонската дипломатија Бујар Османи, на денешните средби во Берлин со неговиот домаќин, германскиот сојузен министер за надворешни работи, Хајко Мас, и со германскиот државен министер за Европа, Михаел Рот.
„Факт е дека Берлин е најсилен предводник за европската перспектива и на Северна Македонија, како и на целиот регион. Имаме важен Самит пред нас и поддршката од партнерите како Германија е неопходна, прво за да ги надминеме разликите со Бугарија, за да се одблокира процесот, но и да го вратиме европскиот кредибилитет во регионот, спротивставувајќи се со тоа и на скептицизмот во ЕУ“,
истакна Османи.
Средбата со државниот министер за Европа, Рот, како што соопштија од МНР, била искористена да се реафирмира германската позиција за нашето европско досие, за актуелностите од регионален аспект, но и да се дискутира за следните чекори и реформи, потребни за деблокирање на проширувањето на ЕУ.
„Балканот, географски не е на европската периферија и затоа тоа не смее да биде ниту на периферијата на политичкото внимание. Нашата дипломатија е таргетирана и посветена на себевложување во градењето добрососедски релации, регионална соработка и реализација на визијата за видлива и достижна европска иднина“,
нагласи Османи, како што е наведено во соопштението од МНР.
За средбата со Мас, Османи информира на Фејсбук дека, покрај реафирмацијата на исклучително успешните билатерални односи е реафирмиран и цврстата поддршка од Германија за напредок во нашите европски интеграции.
„Нашето европско досие преставува лакмуст тест за европските перспективи на регионот, што, пак, е најсилниот политички инструмент за зајакнување на внатрешната стабилност на земјите, унапредување на добрососедските односи, како и за создавање потенцијал за зајакната регионална соработка. Привилегија е да се има Германија за промотор на овие политики на Балканот, за што ја изразуваме нашата огромна благодарност“.
напиша Османи по средбата со Мас.