Пендаровски ќе се сретне со претседателката на Грција, Сакеларопулу, премиерот Мицотакис и градоначалникот на Атина, Бакојанис
Шефот на државата Стево Пендаровски на 5 и 6 октомври ќе престојува во дводневна посета на Хеленската Република што ќе биде прва историска посета која ќе се реализира на највисоко ниво меѓу двете држави.
Во вторникот (5 октомври) пред претседателската палата во Атина тој ќе биде пречекан од неговата грчка колешка, Катерина Сакеларопулу, на официјална церемонија со државни и воени почести. Потоа, тие ќе одржат и тет-а-тет средба, а планиран е и состанок на двете државни делегации.
Пендаровски ќе има средби и со премиерот Кирјакос Мицотакис и со градоначалникот на Атина, Костас Бакојанис.
„Во рамки на посетата, претседателот ќе положи венец пред споменикот на незнајниот војник на платото пред Парламентот на Хеленската Република, ќе го посети музејот Бенаки, каде што е предвидено разгледување на архивата на Константинос Доксијадис и ќе оствари средба со амбасадорот на САД во Хеленската Република, Џефри Пјат“,
информираа од кабинетот на Пендаровски.
Со него ќе патува и сопругата Елизабета Ѓоргиевска во рамки на дамската програма, придружувана од грчката министерка за култура и спорт Лина Мендони, ќе ја посети Националната галерија во Атина.
Првата официјална посета на претседател на Северна Македонија на Грција, шефот на државата ја најави и во гостувањето во емисијата „360 степени“ на 10 септември.
„Она што е интересно, а ние мораме нешто од тоа да учиме после 30 години независност, ми закажаа, ми понудија средба со лидерот на опозицијата. Бидејќи знам какви се балканските политики, јас прашувам дали тоа предизвика некаква реакција од оние кои се во власт. Не, велат, традиција е кога доаѓаат такви гости од надвор, да се видат и со лидерот на опозицијата, кој и да е“,
рече тогаш Пендаровски.