Лидерот на ВМРО-ДПМНЕ, вечерва беше и во Демир Хисар и во Могила. На граѓаните тој им порача дека ова не се обични локални избори туку избори на кои ќе се определи во каква насока ќе се движи државата
Во рамки на предизборните активности вечерва, независната кандидатка за градоначалничка на Град Скопје, Данела Арсовска, која е поддржана од ВМРО-ДПМНЕ, пак, беше на средби со граѓаните во Ѓорче Петров. Таму, таа вети проширување на крак на булеварот „Теодосиј Гологанов“, како и два нови кружни тека
Заеднички патриотизам е како да создадеме напредна Битола и напредна Македонија, кои ќе имаат стандард како Виена и Австрија. Да градиме мостови на соработка со соседите, а не кукавичлукот на премиерот кој ни го продава тоа како храброст. Да се бориме за патишта и паркови и во Тетово, и во Куманово, во Битола, во Скопје, секаде низ Македонија. Да создаваме дела кои ќе создаваат нова иднина, порача лидерот на ВМРО-ДПМНЕ, Христијан Мицкоски на партиски митинг пред битолчани во рамки на предизборната кампања за локалните избори закажани за 17 октомври.
Барајќи ја довербата за кандидатот за градоначалник на Битола од неговата партија, Тони Коњановски, Мицкоски нагласи дека во програмите на кандидати на ВМРО-ДПМНЕ има повеќе од 14 835 проекти од различни сфери, најмалку 2 000 улици низ Македонија, 100 градинки, 150 училишта и исто толку паркови, 60 објекти од културата, 90 спортски сали, гасификација итн.
„Секаде каде што отидов досега видов градоначалници коишто се мали зоранчиња. Само тука во Битола велат Вице за градоначалник. Си се имаат поделено, еден град за него, еден за бате. Е, овој Битола му паднал на батето за тоа што РЕК Битола му бил интересот. И решиле од Битола да прават стентон град. Рецептот им е Струмица, таму фамилијата главни, а овде стентоновци сакаат да бидат главни подизведувачи на овие првите од фамилијата Заеви. Е, нема тоа да биде“,
рече Мицкоски пред битолчани.
Тој повторно кажуваше вицеви на сметка на лидерот на СДСМ, Зоран Заев.
„И кога сме кај овој Зоран Заев, иако е тешко време ќе ми дозволите да кажам една шега којашто се раскажува деновиве низ Македонија. Сега пред некој ден кога беше овде во Битола со новото БМВ одлучил Заев да се паркира пред Епинал, но пред него таму на тоа место паркирал некој граѓанин. Доаѓа полицаецот и му вели на граѓанинот веднаш препаркирај го возилото доаѓа Зоран Заев, премиерот. А, вика јас за ваквите како него имам лек, си ставив и аларм, а богами и камера за да не ми го снема возилото“,
рече Мицкоски.
Кандидатот за градоначалник, Коњановски, пак, вети борба за инвестиции во Битола, уредување на инфраструктурата во индустриската зона Жабени, ново основно училиште во населбата Буковски ливади, изградба и реконструкција на спортски сали, примарни велосипедски патеки и премини низ целиот град, уредување на патеките во комплексот Касарна, модернизација на комуналните услуги, современ парк со авантуристички содржини, збогатување на туристичката понуда за Пелистер и др.
Претходно, Мицкоски ја посети и Могила барајќи ја довербата од граѓаните за кандидатот за градоначалник на ВМРО-ДПМНЕ, Драганчо Саботковски. Саботковски вети развој на комунална и инфраструктурна мрежа, реконструкција на фасадите и ефикасно затоплување на училиштата, функционална индустриска зона „Петилеп“ итн.
ВМРО-ДПМНЕ одржа митинг и во Демир Хисар. Исто како и на останатите партиски настани вечерва, партискиот лидер ја побара поддршката од граѓаните бидејќи, според него, ова не се обични локални избори туку избори на кои ќе се определи во каква насока ќе се движи Македонија.
Во рамки на предизборните активности вечерва, независната кандидатка за градоначалничка на Град Скопје, Данела Арсовска, која е поддржана од ВМРО-ДПМНЕ, пак, беше на средби со граѓаните во Ѓорче Петров.
„Градот Скопје мора да се развива еднакво. И во центарот на градот, но и во овие преубави населби околу него. Тука во Ѓорче Петров, се обврзувам дека за мене нема заборавен населба. Не смее Волково, Кучково, Даме Груев, Ново Село, Орман и Никиштани и Кисела Јабука да немаат чиста вода за пиење или да немаат канализација или асфалт или игралишта за нашите млади генерации. Мораме да работиме на растеретување на сообраќајот и на главната артерија низ Ѓорче Петров, и на влезот на градот Скопје од западен правец, но и на артериите кои го поврзуваат Ѓорче Петров со останатиот дел од градот. За решавање на овие проблеми нема да чекаме 4 години. Почнуваме веднаш“,
рече Арсовска.
Меѓу проектите кои таа ги вети пред граѓаните на Ѓорче Петров се проширување на кракот на булевар „Теодосиј Гологанов“ до раскрсница со булеварот „Ѓорче Петров“ и изградба на сообраќајница со четири ленти, како и два нови кружни тека, еден на влезот во Ѓорче Петров од Сарај и друг на улица „Македонска војска“.