Утре Ахмети официјално ќе претстави 18 кандидати за градоначалници на ДУИ. Заев, пак, денеска изјави дека доколку на локалните избори се случи во втор круг да влезат двајца кандидати од партиите од коалицијата, тогаш нема да им се сугерира на партиските членови за кого да гласаат
Првиот вицепремиер и член на претседателството на ДУИ, Артан Груби, вели дека коалицијата на ВМРО-ДПМНЕ со Алијанса за Албанците и Алтернатива за претстојните локални избори е несвојствена и едвај чека да види како гласачите на едните ќе гласаат за другите и обратно.
„По социјалните мрежи ја нарекуваат коалиција ’27-ми‘, тоа е коалиција на поделби, не е коалиција на заедништво, коалиција на ‘Скопје 2014’, а не за едно цело Скопје и заедничко и наше. Многу е несвојствено и навистина едвај чекам да го видам денот кога сите гласачи на Алијанса со цело свое срце, со цел тој ентузијазам и љубов ќе гласаат за ВМРО-ДПМНЕ на Никола Груевски и Христијан Мицкоски. И обратно, сите тие патриоти на ВМРО-ДПМНЕ, сите кои влегоа на 27 април во Собранието, сите тие што го поддржуваа ’Скопје 2014‘ ќе гласаат со големо убедување и цело срце за Зијадин Села и Алијансата“,
рече Груби.
Тој најави дека утре лидерот на ДУИ, Али Ахмети, официјално ќе претстави 18 кандидати за градоначалници за локалните избори. Повеќето од нив се актуелни градоначалници и Груби очекува најголемиот дел да победат уште во првиот круг од изборите кој треба да се одржи на 17 октомври.
ДУИ на овие избори договори соработка со најголемиот коалициски партнер, СДСМ, но во договорот за поддршка се и останатите партнери од централната власт, како Беса и ДПА.
На прашање дали очекуваат поддршка од СДСМ, Груби денеска застана зад изјавата на лидерот на СДСМ, Зоран Заев, кој рече дека онаму каде што кандидати ќе имаат двајца или повеќе коалициски партнери, партијата нема да им сугерира на граѓаните за чиј кандидат да гласаат.
„Кога имаме кандидат од СДСМ, ДУИ, Беса, ДПА, како на пример, Тетово, тогаш е логично граѓаните да ги оставиме сами да одлучат, вклучително и нашите членови. Ќе си гласаме сите за свој кандидат. Таму каде што СДСМ нема свој кандидат, тогаш на нашите членови ќе им препорачаме за тоа што е најдобро за нив. Во вториот круг, кога ќе влезе еден од коалициските партнери, логиката вели дека ќе си гласаме за тој од коалицијата, да го поддржиме. Ако се случи во втор круг да влезат двајца коалициски партнери, логично е да се држиме принципиелно и коалицијата да остане за сите, односно сите наши членови ќе добијат напатствија да гласаат онака како што мислат дека е најдобро за нашата општина“,
изјави Заев.