Според опозицискиот лидер, соработката со Села и Гаши е историски чекор и за ВМРО-ДПМНЕ и за Македонија, наспроти оценките на СДСМ дека тоа е „коалиција од немајкаде“
Направивме коалиција уште пред првиот круг на локалните избори во определени градови. Ќе се подржуваме во определени општини, на ниво на кандидати за градоначалници. Договорено е таму каде што коалицијата Алтернатива/Алијанса ќе има кандидат, ВМРО-ДПМНЕ да не кандидира и обратно. Се разбира, во тие општини каде таа соработка е договорена, изјави денеска во Берово лидерот на ВМРО-ДПМНЕ Христијан Мицкоски, зборувајќи за договорот за соработка со Зијадин Села и Африм Гаши на претстојните локални избори.
Според Мицкоски, соработката со Алијанса за Албанците и Алтернатива е историски чекор, како што вели, и за ВМРО-ДПМНЕ, но и за Македонија.
„Очекувам оваа коалиција да ги победи поделбите, безнадежноста, криминалот, корупцијата, безидејноста, неспособноста, немањето визија и стратегија за развој на Македонија, историски момент за сите граѓани без разлика на етничката припадност, да покажеме дека навистина Македонија има можности и со други политичари кои се надвор од матрицата на СДСМ и на ДУИ и дека може поинаку“,
рече Мицкоски.
ОД СДСМ, пак, денеска реагираа за коалицијата меѓу ВМРО-ДПМНЕ со Алијанса/Алтернатива за локалните избори, оценувајќи дека тоа е “од немајкаде коалиција, која е однапред осудена на пропаст и на пораз“’.
„Мицкоски е до толку уплашен што промовира коалиција со истите оние кои ги нарекуваше предавници, оние кои, според ВМРО-ДПМНЕ, не го признаваат македонскиот идентитет и со истиот Села, кого неговите од ВМРО-ДПМНЕ насилно го влечеа во Собранието и му нанесоа крвави животно загрозувачки повреди на 27 април. Им кажа ли Мицкоски на Села и Гаши дека сака поништување на Договорот од Преспа? Им соошти ли дека е против Законот за јазици?Им раскажа ли што бараше во Собранието на 27 април“,л
се навдедува во реакцијата на СДСМ.
Одговарајќи на новинарско прашање за кандидатите на СДСМ за градоначалници, лидерот на ВМРО-ДПМНЕ оцени дека „тоа се стари истрошени луѓе од времето на транзицијата, кои се покажаа комплетно неспособни и кои ја изневерија довербата на граѓаните“. Посебно го коментираше Горан Сугарески, како кандидат на СДСМ за Прилеп.
„Во Прилеп кандидираат еден поранешен долгогодишен пратеник, шеф на пратеничка група, малку беше министер, па малку директор на Царина, сега сака да биде малку градоначалник, но тоа ќе биде најверојатно и неговиот крај на политичката кариера, а потоа следи и одговорност за тоа како министерувал и како директорувал во Царината, треба да е свесен за тоа“,
потенцираше Мицкоски.
Нема да бидам како СДСМ и да го коментирам нашиот политички противник, тоа си е нивна работа, истакна од друга страна Мицкоски,
„Од она то го слушам од медиумите, двајца нивни актуелни градоначалници практично ќе настапат на овие избори како кандидати кои ќе бидат поддржани од група избирачи, односно независни кандидати. Она што е важно е дека доаѓа крајот на оваа неспособна власт, предводена од коалицијата СДСМ и ДУИ“,
потенцира Мицкоски.