Во повик, овој пат упатен до партиските симпатизери, Мицкоски предлага во општините каде што Левица нема кандидати за градоначалници да се поддржат кандидатите на ВМРО-ДПМНЕ, која, пак, во вториот круг ќе поддржи кандидати на Левица
Лидерот на ВМРО-ДПМНЕ, Христијан Мицкоски, денеска повторно ја повика Левица на соработка како опозициски партии на претстојните избори.
Иако претседателот на Левица, Димитар Апасиев, неодамна јавно ја одби понудата од Мицкоски „за обединување против власта“, лидерот на ВМРО-ДПМНЕ сега се обраќа до симпатизерите на Левица.
Мицкоски предлага во општините каде што Левица нема кандидати за градоначалници да се поддржат кандидатите на ВМРО-ДПМНЕ, а неговата партија, како што вели, во вториот круг ќе поддржи кандидати на Левица.
„Без разлика на одлуката и однесувањето на раководството, ги повикувам симпатизерите на Левица да нè поддржат во општините каде што немаат свој кандидат. За возврат, во вториот круг, каде што ВМРО-ДПМНЕ нема да има свој кандидат, ќе повикам да се поддржат кандидатите на Левица“,
напиша Мицкоски на Фејсбук.
ВМРО-ДПМНЕ неодамна постигна договор за соработка на изборите со другите две парламентарни партии од опозицискиот блок – Алијанса за Албанците и Алтернатива.
Локалните избори се спроведуваат во два круга, со тоа што изборот на советници во општините завршува во првиот круг. Во вториот круг, пак, одат двајцата кандидати за градоначалници што ќе освојат најмногу гласови при првото изјаснување. Сепак, според досегашните искуство, во голем дел од општините и изборите за градоначалник завршуваат во првиот круг.