Денеска во Владата се одржа свечена седница по повод 8 Септември, а годинава се одбележуваат 30 години од независноста
Денот на независноста, 8 Септември, ќе остане запаметен како ден кога се обединивме за да ги утврдиме нашите стратегиски патокази и да трасираме пат за демократски развој, исполнет со меѓусебно разбирање, благосостојба и просперитет. Го зедовме најдоброто наследство од минатото и создаваме држава со сосема извесна европска иднина.
Вака премиерот Зоран Заев се обрати на денешната свечена владина седница по повод 30-години независност.
Тој своето обраќање го започна со хронологија на настаните, од 8 септември 1991 година, кога граѓаните на тогашна Република Македонија донесоа историска одлука и глaсаа „за“ независност и „за“ суверенитет на референдумот, по што следуваше создавањето на нашата армија, монетарната самостојност и воведувањето државна валута, меѓународното признавање на државата, решавањето на внатрешниот конфликт, и реализацијата на стратегиските определби за членство во НАТО и ЕУ.
„Тоа беше храбро и одлучно соочување со историските околности во тој период и израз на силна верба во перспективата за нов почеток, за подобар живот и за подобра иднина во независна, во своја држава… Сето тоа беа тестови на зрелоста. Дел од нив ги положија генерациите пред нас. Дел од нив ги положивме ние. Сите, со многу работа и многу вложен труд, и со искушенија од коишто се учи дека секогаш може подобро“,
рече Заев.
Од денешен аспект, според Заев, Република Северна Македонија својата независност ја потврдува во најмоќниот воено-безбедносен сојуз – НАТО, и како кандидат за членство и во најсилната економска заедница на светот – Европската Унија, како отворена, праведна, стабилна, земја на можности на неколку цврсти столбови – за правна држава и владеењето на правото, економски раст, општество и институции како сервис за граѓаните…
„Во пресудни моменти, кога се решаваа историски прашања, граѓаните на нашата земја и одговорните политички лидери носеа големи одлуки. Направија, вистински, исправни избори. Во периодот од 77 години од државотворниот АСНОМ и 30 години пат на самостојно, независно учество во животот на заедницата на народите, научивме неколку важни лекции. Една од најважните од овие лекции е лекцијата за чувањето и негувањето на демократија. Во последните 6 години, граѓанските вредности во нашата земја повторно се највисоко поставени, слободата и демократијата се на пиедесталот“,
рече Заев.
Порача дека општеството кое се гради е на основа на граѓански вредности каде сите се еднакви и исто вредат, дека делбите и кавгите заради тесно партиски или националистички интереси, или заради интереси спротивни на нашите стратегиски определби, никому не донесоа ништо добро, ниту ќе донесат во иднина.
Затоа, апелира на посветеност на исти, стратегиски цели за нашата држава, за сите наши граѓани, за да нема толку длабоки делби меѓу нас.