Сите 149 лица кои пристигнаа од Авганситан ќе бидат тестирани на ковид-19 со ПЦР-тест и доколку има позитивни случаи ќе бидат во двонеделен карантин
Трудница од Авганистан која вечерва пристигна со авион на Меѓународниот аеродром во Скопје беше веднаш префрлена на Клиниката за гинекологија, бидејќи се наоаѓа во 39. недела од бременост и во секој момент се очекува да се породи. Во авионот, меѓу 149 граѓани од Авганистан кои вечерва преку Грузија пристигнаа во Скопје, имало уште четири бремени жени.
Министерот за надворешни работи, Бујар Османи, вечерва присуствуваше за време на слетувањето на авионот кој донесе 149 евакуирани граѓани од Авганистан и кои ќе добијат привремен престој во земјава.
„Солидарноста која што ја најавувавме веќе неколку дена денеска ја демонстрираме на дело и им овозможуваме топло добредојде на оние што им е најпотребна. Бројката за која што ние имаме дадено согласност досега и за кое што има барање е околу 750 граѓани пред сè жени и деца на вработени во меѓународни организации“,
изјави министерот Османи.
Тој рече дека трошоците за логистика за транспортот на овие лица се покриени од меѓународните организации за кои тие работеле. Станува збор за лица вработени (и членови на нивни семејства) во Отворено владино партнерство (Open Government Partnership – OGP) каде што Северна Македонија е официјално членка, како и вработени и соработници на „Транспаренси интернешнл“, Светски економски форум и други меѓународни организации.
Раководителката на Итната медицинска помош, Милица Бубало, рече дека сите кои пристигнаа ќе бидат тестирани со ПЦР-тест на ковид-19 и доколку има позитивни случаи ќе се одреди 14 дневен карантин.
„Ќе го провериме и нивниот вакцинален статус и доколку некој што не е вакциниран изрази желба за вакцина против ковид, ќе му биде овозможено тоа да го стори“,
рече Бубало.