Министерот за внатрешни работи, Оливер Спасовски, рече дека бројот на граѓани од Авганистан што треба да пристигнат во земјава се менува, бидејќи постојано се менува и состојбата во Кабул
На Меѓународниот аеродром Скопје вечерва ќе пристигне првата група граѓани од Авганистан, соопшти Владата.
Претходно, министерот за внатрешни работи, Оливер Спасовски, во гостување на Канал 5, рече дека бројката на авганистански цивили, кои работеле за меѓународните организации, што ќе бидат прифатени во земјава, се менува поради состојбата во Кабул и дека граѓаните треба да бидат спокојни, бидејќи нема никаква основа за нарушување на безбедноста и здравјето во делот на оваа оперативна акција.
„Имаше потврда за околу 780 лица, но поради случувањата во Кабул и неможноста да тргнат луѓето од таму и да се заврши оваа мисија, таа бројка постојано флуктуира. И МВР и Агенцијата за национална безбедност и Агенцијата за разузнавање ги преземаат сите мерки од безбедносен аспект и граѓаните може да бидат спокојни, бидејќи немаме никаква основа за нарушување на безбедноста во делот на оваа оперативна акција. Од друга страна, и Министерството за здравство ги презема сите свои активности и надлежности кои произлегуваат од заштита на здравјето на населението, посебно сега во услови на корона вирусот. Ќе се понуди соодветна здравствена нега и вакцинација за тие што не се вакцинирани“,
рече Спасовски.
Тој пивтори дека лицата што ќе дојдат во земјава ќе бидат сместени во хотели и мотели, како што беше претходно најавено.