Лидерот на ВМРО-ДПМНЕ, Христијан Мицкоски, не соопшти став за потегот на министерката за труд и социјална политика, Рашела Мизрахи, со враќањето на таблата со претходното уставно име на земјава Република Македонија. На денешната прес-конференција на која Мицкоски промовираше делови од изборната програма на ВМРО-ДПМНЕ, лидерот на опозициската партија беше прашан за одлуката на Мизрахи, предложена за министерка токму од ВМРО-ДПМНЕ, но одбегна директен одговор и повика за тоа да биде прашана лично Мизрахи.
„Ве охрабрувам прашањето за таблата да го упатите до министерката Мизрахи и убеден сум дека ќе добиете вистински одговор“, рече Мицкоски.
Притоа, тој додаде дека ВМРО-ДПМНЕ не ја игнорира реалноста со Договорот од Преспа, но и дека „никој во овој демократски свет не може да ги спречи да се обидат да ја сменат неправдата што ни е нанесена со тој договор“.
СДСМ: Мизрахи и Мицкоски го загрозуваат интегрирањето во НАТО и ЕУ
Претходно, во писмена реакција, од СДСМ оценија дека „Христијан Мицковски и ВМРО ДПМНЕ со полна пареа работат да ја вратат државата чекор назад“.
За потегот на министерката Мизрахи велат дека е „непочитување на Уставот, но и загрозување на Договорот од Преспа, а со тоа и загрозување на членството во НАТО и интеграцијата во ЕУ, затоа што без Договорот нема ни НАТО ни ЕУ“.
„Работејќи противуставно преку своите технички кадри во Владата на РСМ, Мицкоски и ВМРО-ДПМНЕ се обидуваат да ги загрозат европските процеси на државата, а со тоа и да ја загрозат и иднината на нашата земја“, велат од СДСМ.