Берово е најпознатиот македонски град во Словенија, бидејки луѓето со внимание ги следеа вестите за пожарите, така што нашите срца беа со вас, изјави словенечкиот министер за одбрана, а македонската министерка најави дека двете држави ќе настапат со заедничка програма за реформирање на противпожарниот систем во земјава
Министерката за одбрана Радмила Шекеринска и нејзиниот словенечки колега Матеј Тонин синоќа го посетија Берово, каде што неодамна пожарникари од Словенија учествуваа во гасење на пожарите што посебно го зафатија тој регион од земјава.
Шекеринска и Тонин имаа имаа средба со градоначалникот на Берово Звонко Пекевски и со локалното население.
Градоначалникот, како што соопшти МО, ја пренел благодарноста на луѓето од Малешевијата за помошта што им ја пружија словенечките пожарникари и Армијата при неодамнешните пожари.
Шекеринска посочила дека по трагедијата што се случи во Берово и големата поддршка од Словенија стана јасно дека на противпожарниот систем му е потребна реформа и дека поддршката од пријателските земји треба да се користи во таа насока.
„Словенија има големо искуство, тоа се виде и во Берово и тоа ќе го искористиме. Министерот Тонин понуди шанса наши пожарникари да заминат на обука во Словенија, а на противпожарните единици да им обезбедат опрема и обука за ракување. Берово ги зближи нашите две земји во врска што ќе се памети и ќе трае засекогаш“,
истакна Шекеринска и дополни дека двете држави ќе настапат со заедничка програма за реформирање на противпожарниот систем во земјава.
Тонин истакна дека е задоволство да се помогне на пријателите кога најмногу имаат потреба од помош.
„Веднаш одговоривме на повикот со праќање противпожарни екипи и опрема. Задоволство ми е што бевме дел од успешната акција за победа над пожарите, за да се спаси она што беше неопходно да се спаси, на што сме многу горди. Берово е најпознатиот македонски град во Словенија, бидејки луѓето со внимание ги следеа вестите од овде за време на пожарите. Берово цело време беше присутно во медиумите, така што нашите срца беа со вас во тоа време и радосни сме што немаше човечки и материјални штети”,
рече Тонин.
Тој посочи дека Словенија преку нашето Министерство за одбрана ќе продолжи со поддршката во делот на противпожарната заштита особено преку донации во опрема како поддршка за пожарникарите.