Изјавата пациентот ја потпишал на 24 август кога бил примен во болницата во Битола, за еден ден подоцна од болницата во Охрид да биде пренесен во Битола во многу тешка состојба, по што утрово починал
Во системот, како што додаваат од Министерството за здравство, не се заведени коморбидитети кај пациентот и тој не бил вакциниран
Министерство за здравство вечерва објави детали во врска со случајот со 24 – годишниот пациент од Ресен кој денеска наутро почина како последица на ковид-19 во болницата во Битола.
Момчето, кое на 15 овој месец правело свадба, на 24 август било примено на инфективното одделение во болницата во Битола како суспектен на болеста – имал ниска сатурација и отежнато дишење, биле направени сите потребни лекарски проверки, притоа тој имал масивна бронхопневмонија, и веднаш му била дадена терапија и кислородна поддршка.
„Откако ја примил терапијата, пациентот одбива да остане на болничко лекување, иако запознаен со сериозноста на состојбата и потребата од доиследување, пациентот бара да биде пуштен на домашно лекување. По потпишана изјава дека си оди на сопствена одговорност, пациентот е испишан со препишана терапија која треба да ја прима во модуларната болница во Ресен“,
велат од Министерството.
Следниот ден, на 25 август, пациентот како што наведуваат, е донесен од болницата во Охрид за хоспитализација во Битола.
„Веднаш е хоспитализиран во тешка општа состојба со ниска сатурација, поставен на двојна кислородна поддршка, интензивна терапија, но и покрај тоа постојано му се влошува состојбата и паѓа сатурацијата. На 27 август утрото и покрај обидите на лекарите да го спасат, пациентот починал“,
посочуваат од Министерството.
Во системот, како што додаваат од Министерството за здравство, не се заведени коморбидитети кај пациентот и тој не бил вакциниран.