Собирањето потписи за независни кандидати за градоначалници и за советнички листи трае до 30 август
Државната изборна комисија (ДИК) на денешната 17. седница соопшти дека досега 15 независни кандидати за градоначалници ги собрале потребните потписи за учество на локалните избори, а потписи собрале и 30 независни советнички листи во различни општини во подрачните единици на ДИК.
До 30 август трае собирањето потписи за независните кандидати за градоначалници и советнички листи, а вработените во подрачните единици, утре и в недела ќе работат еден час подоцна, додека на 30 август, ќе работат до 24 часот, беше соопштено на седницата.
Во тек е собирањето потписи на уште независни кандидати за градоначалници што не се завршени, како и на советнички листи.
ДИК на денешната седница исто така соопшти дека заклучно со вчерашниот ден, вкупно 5 164 лица се провериле во Избирачкиот список. Од нив се поднесени вкупно 11 барања за запишување во Избирачкиот список, 12 барање за бришење на податоците од Избирачкиот список и четири барања за измена на податоците во Избирачкиот список.
До ДИК на е-адресата upisis@sec.mk се поднесени вкупно 17 барања.
Постапката за јавен увид во Избирачкиот список за локалните избори закажани за 17 октомври ќе трае до 9 септември.
Јавен увид граѓаните можат да направат во подрачните единици и канцеларии на ДИК, како и електронски преку веб-страницата на Комисијата.