Општинскиот кризен штаб дискутираше и за ставање на Гостивар во карантин, но градоначалникот Арбен Таравари вели дека сега таква мерка не е неопходна
Загрижувачка е состојбата со коронавирусот во Гостивар по зголемувањето на бројот на новозаразени. Општинскиот кризен штаб денеска се состана и донесе неколку заклучоци со цел подобрување на ситуацијата.
„Ситуацијата е сериозна, но под контрола. Апелираме до граѓаните да се придржуваат до препораките на институциите и да се вакцинираат, бидејќи вакцинацијата е најдобрата заштита од оваа болест, утврдено од страна на многу светски истражувања. Затоа, Општина Гостивар ги отстапува своите капацитети за отворање на нови пунктови за вакцинација на територијата на Гостивар“,
изјави градоначалник на Гостивар, истовремено и претседател на Кризниот штаб во Гостивар, Арбен Таравари.
На состанокот се дискутираше и опцијата за Гостивар да се стави под карантин, но Таравари смета дека сега не е потребна таква мерка.
„Внимателно го слушав директорот на болницата и претставникот на Здравствениот дом и среќен сум што ситуацијата е под контрола, има капацитет и независно како се гледа однадвор, вакцинација во Гостивар, внатре во Здравствениот дом се одвива без пречки. Ние како општина немаме надлежности за карантинска мерка и додека тоа не го бараат соодветните институции, нема да направиме такво нешто“,
додаде Таравари.