Царинските инспектори од Одделението за оперативни работи привремено задржаа вкупно 1 000 парчиња антиген тестови за ковид-19 при контрола на автобус на граничниот премин „Табановце“.
Оттаму информираат дека на граничниот премин „Табановце“ вчера во 13 часот за влез се пријавил автобус со македонски регистарски на превозникот „Дурмо турс“ од Гостивар, управувано од лицето С.М од Гостивар, кој сообраќа на редовна линија Германија-Струга. При извршена детална контрола, во багажниот простор биле пронајдени непријавени три пакети од патникот Б.С од Гостивар, во кои се наоѓале 1 000 парчиња антиген тестови за ковид-19 марка „Хотген“, со вкупна вредност од околу 50 000 денари.
Стокaта е привремено одземенa со потврдa за привремено одземени предмети, а против пријавеното лице ќе биде поднесено барање за поведување на прекршочна постапка до Одделението за прекршочна постапка при Царинска управа.