За квалификацијата „фашизоидни мерки за вакцинално картонче во кафеана“, што беше употребена на прес-конференциите на неговата партија, тој објаснува дека нивниот став е дека мерките не требало да бидат брутално наложени
ВМРО-ДПМНЕ не ги организираше протестите, ниту поддржува протести, бунтови против вакцинацијата, вели Игор Николов, претседател на Комисијата за здравство на ВМРО-ДПМНЕ, кој по професија е лекар.
Во интервју за Радио Слободна Европа тој зборува за тоа што смета оваа опозициска партија дека власта не направила навремено за да се спречи растот на заразени последниве недели.
„За жал, и за овој четврт бран чувството и кај мене и кај колегите е дека не гледаме јасно кој е планот. Општото чувство е дека повторно влегуваме во нешто, можеби повеќе спремни од претходно, но не задоволително, поради тоа што чувството на неорганизираност и недобар план и понатаму постои“,
вели Николов.
На прашањето што тој би презел кога би бил на местото на министерот за здравство Венко Филипче, Николов вели:
„Како најпрво и најзначајно, требаше да се воспостави контрола на границите, на граничните премини. Во никој случај не смееше да се дозволи луди журки и забави во затворен простор. Можеби, тоа не беше дозволено на хартија, официјално напишано, но сите бевме сведоци. Ние кога сме сведоци дека нешто се случува, не видовме корективна реакција. Овие собирања во затворен простор траеја два и пол месеци, сите бевме свесни дека тоа ќе резултира со некаков исход, но никаква мерка не беше преземена, никаква корективна акција не видовме. Не можеме само да кажеме дека имавме мерки на хартија, но некој не ги спроведувал и не ги контролирал мерките“,
објаснува тој.
За квалификацијата „фашизоидни мерки за вакцинално картонче во кафеана“, што беше употребена на прес-конференциите на неговата партија, тој вели дека нивниот став е дека мерките не требало да бидат брутално наложени.
„Морам да ви кажам дека централната здравствена комисија предводена од мене и највисокото раководство на партијата во континуитет повикуваме на вакцинација на популацијата. Сето тоа не може да не класифицира во категоријата на некој што бил против вакцинацијата. Ние цело време потенциравме дека доколку вакцините беа навремено на располагање, доколку навистина се спроведеше вистинска стимулација на процесот на вакцинација и вистинско забрзување со промотивни мерки и промотивни активности на вакцинацијата, ние ќе имавме поголем вакцинален опсег. Ние не можеме во моментот да се пофалиме со вакцинален опсег од 32 проценти со прва доза од општата популација. Мала ни е бројката на вакцинирани од возрасната популација. За сето тоа зборуваме и дури забрзувањето на вакцинацијата беше една од препораките што ги дадовме пред да почне летото“,
вели Николов во интервју за Радио Слободна Европа.
Целото интервју може да го погледнете на следниот линк.