Шефот на државата рече дека во овој регион во изминатите четири-пет дена има најмногу пожари и затоа и најголем дел од армиските единици се концентрирани тука
Претседателот и Врховен командант на вооружените сили, Стево Пендаровски, вечерва ги посети припадниците на Армијата во Оперативниот центар на Првата пешадиска бригада во село Тработивиште, Делчевско, кое беше едно од најкритично зафатените подрачја во државата.
Припадниците на армијата, како што соопштија од претседателскиот кабинет, го информирале Пендаровски за активностите во изминатите неколку дена и нивните обврски како поддршка во гаснењето на пожарите во оваа област.
„Ова што го чув последно од последниот брифинг од Армијата е дека ситуацијата е под контрола, што е добро. Јас се надевам дека и временските прилики, со помалку ветер, во наредниве денови ќе ни одат во прилог. Инаку, не можевме самостојно, не можевме тоа да го исконтролираме, Армијата беше практично ударната тупаница на здружените напори на различните институции во Северна Македонија, меѓутоа морам да кажам и да се заблагодарам и на државите кои ни помогнаа во тие заеднички напори“,
истакна Пендаровски.
Тој рече дека во овој регион во изминатите четири-пет дена има најмногу пожари и затоа и најголем дел од армиските единици се концентрирани тука.
„Ние имаме околу 250 војници на Армијата на Северна Македонија и тие ќе останат тука додека има потреба. Ако има потреба ќе донесеме и повеќе луѓе. Мислам дека во овој момент, во таа човечка смисла, сме добро екипирани, имаме поддршка и од други институции, се разбира, не е само Армијата. Со заеднички напори мислам дека ја држиме ситуацијата под контрола се додека тоа е неопходно“,
додаде Пендаровски.
Претседателот, како што соопшти неговиот кабинет, ја нагласил важноста од укажаната помош и поддршка од Бугарија, Словенија, Австрија и Србија. Заблагодарувајќи се и за поддршката од Европската Унија, односно, на Агенцијата за цивилна заштита и за хуманитарна помош, претседателот Пендаровски истакнал дека земјава, утрово, добила пристап до заедничкиот сателитски систем на ЕУ, што значително ќе придонесе за рано предупредување од пожари во земјава.