Вакцинацијата се одвива со добро темпо на територијата на целата држава, велат од Министерството за здравство (МЗ). Заклучно со 1 август со една доза вакцина против ковид-19 вакцинирани се 31% од населението над 18 годишна возраст. Кај лицата над 50 годишна возраст опфатот со една доза изнесува 50,6%, кај лицата над 60 годишна возраст опфатот со една доза изнесува 61,2%, додека кај лицата над 70 години изнесува 64,9%.
„Според последните податоци, најмногу со прва доза вакцинирани граѓани, по главниот град Скопје со 159 514, има во Битола – 35 067. Во Тетово има вкупно 31 007 граѓани, во Куманово, Прилеп и Охрид имаат помеѓу 20 000-25 000 вакцинирани граѓани со прва доза, а помеѓу 15 000-20 000 граѓани во Велес, Кавадарци, Струмица, Гостивар и Штип. Во Кочани и Струга вакцинирани се нешто повеќе од 10 000 граѓани. Во Демир Хисар, Кичево, Ресен, Неготино, Св. Николе, Берово, Виница, Делчево, Пехчево, К.Паланка, Кратово, Дебар, Крушево, М.Брод, Валандово, Пробиштип и Радовиш вакцинирани се под 10 000 граѓани во секој од градовите“,
велат од МЗ.
Од здравство информираат дека во тек е вакцинација во постоечките вакцинални пунктови во државата каде граѓаните може да се вакцинираат без да закажат термин.
„Процесот на теренска вакцинација се одвива на територијата на цела држава со ротации на медицински екипи во секое село, рурално населено место и населба. Процесот на вакцинација со домашна посета се одвива непречено и навремено според заинтересираноста на граѓаните за оваа услуга. Вакцини има доволно и истите се достапни за сите кои сакаат да се вакцинираат“,
информираат од МЗ.
Од МЗ апелираат на што поголема заинтересираност за вакцинирање. Посочуваат дека вакцинацијата е единствен начин да се победи вирусот и да се спречи понатамошно негово ширење во есенските денови за кои во светски рамки е прогнозиран иден нов бран на делта сојот.