Шилегов да излезе и да каже дали зад одмолчувањето и одобрување на градбата на висококатниците кај „Холидеј ин“ се крие поддршката за втората кандидатура од СДСМ, прашаа од ВМРО-ДПМНЕ
Општина Центар, Град Скопје и Министерството за транспорт и врски со месеци молчат и не реагираат во однос на висококатниците кои треба да никнат кај „Холидеј ин“ на над 13.000 м2. Наместо да ги послушаат граѓаните, институциите водени од Шилегов, Богдановиќ и Бочварски си ја префрлаат вината, порачаа денеска од ВМРО-ДПМНЕ и го обвинија СДСМ за бетонизација на центарот на Скопје.
„Шилегов и Богдановиќ пред да дојдат на власт ветуваа ревидирање на сите детални урбанистички планови, воведуваа лажни мораториуми, за на крај да извршат невидена бетонизација на центарот на градот, во непосредна близина на реката Вардар. Не само што СДСМ и институциите водени од нивни кадри ја одмолчуваат бетонизацијата на Центар, туку и директно ја овозможија. Имено од 4.000 м2 површина која ја имале првично купено инвеститорите, СДСМ овозможи да докупат уште 9.000 м2 и тоа градежната парцела да го опфати буквално целиот регион на Ново Маало. Иако лажеа дека нема да дозволат бетонизација, на крај и Општина Центар и Град Скопје ги издадоа сите потребни дозволи за градба“,
порача Бојан Стојаноски од ВМРО-ДПМНЕ.
Од ВМРО-ДПМНЕ прстот го вперија во скопскиот градоначалник, Петре Шилегов, кој го повикаа да каже дали зад одмолчувањето и одобрување на градбата на висококатниците кај „Холидеј ин“ се крие поддршката за втората кандидатура од СДСМ.
„Покрај тоа што Шилегов е неспособен како Заев, и спроведува тендери каде фирмите добитници книжат двојно повеќе пари од тоа што за истите работи плаќаат други општини и градови во регионот, дали Шилегов си ја заработи втората кандидатура со одобрување на висококатниците спроти Холидеј Ин? Шилегов да излезе и да каже, дали зад одмолчувањето и одобрување на градбата на висококатниците кај Холидеј Ин се крие поддршката за втората кандидатура од СДСМ? За чии интереси работи Петре Шилегов? Време е за отвореност и транспарентност. Шилегов да одговори, неговата работа треба да биде пред се за граѓаните. Но тој не успеа да се издигне над партијата. Време е тој да си замине, а со него и сите лажни ветувања и неработа“,
порачаа од ВМРО-ДПМНЕ.