Центарот за управување со кризи (ЦУК) денеска упати апел за превентивни мерки до граѓаните и локалните власти, по најавите за можно локално невреме во повеќе делови на земјата. На градоначалниците, ЦУК им укажа да преземат превентивни мерки и редовно да го известуват Центарот при настани поврзани со невремето.
„Заради најавите за невреме и поројни врнежи Центарот за управување за кризи (ЦУК), преку своите регионални центри, испрати укажување за потреба од преземање превентивни мерки до градочалниците и лицата за контакт во сите региони во државата, коишто при вакви случувања, повратно, го известат регионалниот центар односно ЦУК, за можните настани поврзани со настанато невреме и порои во рамки на заедничко информирање и координирање и регионално и во државата“,
стои во објавата на фејсбук страницата на ЦУК
До граѓаните, пак, од Центарот за управување со кризи упатија апел за превентивни мерки кои би можеле да спречат трагични последици од неврeмето. Меѓу нив, се препорачува да се избегнува отворен простор, осамени дрвја, движење покрај реки и други мерки, во случај на поројни врнежи и грмотевици.
„Конкретно, покрај препораката за градоначалниците и субјектите во Системот за управување со кризи за преземање превентивни мерки, неодминливо е да се апелира и до сите граѓани да не се движат покрај речни корита и суводолици (за време и по локално невреме), заради можни брзи и ненадејни порои, да не престојуваат и да се засолнуваат во простори што се на пониско ниво и може да бидат поплавени и секако, во случај на појава на грмежи и електрични празнења се препорачува поголема внимателност – да не се престојува на отворен простор и под осамени дрвја“,
наведува ЦУК