Опозициската партија вчера во Охрид одбележа 31 година од формирањето, при што партискиот лидер порача дека се обраќа кон сите што своите идеали ги наоѓаат во десниот политички спектар, од мекиот центар, до крајната десница
Ве охрабрувам и ве замолувам да продолжите по евроатлантскиот пат на вашата држава, како што е предвидено во основачките документи на партијата, апелира генералниот секретар на Европската народна партија (ЕПП), Aнтонио Лопез Истуриз, во поздравна честитка по повод 31-годишнината од основањето на ВМРО-ДПМНЕ.
„Драги пријатели од ВМРО-ДПМНЕ, мое задоволство е да ви се обратам денеска на роденденот на вашата партија и наша членка – ВМРО-ДПМНЕ. На 17 јуни, пред точно 31 година, вашата партија беше основана, a вие сте денес собрани заедно за да го одбележите тој настан. Како што Вашите основачки документи и нагласуваат, многу јасен проевроатлантски пат за вашата држава. Јас ве замолувам и ве охрабрувам да продолжите по тој пат, согласно принципите на вашите основачи. Овој пат никогаш не бил лесен. И повторно денеска предизвиците се големи. Да работиме заедно за подобра заедничка иднина, ние сметаме на ВМРО-ДПМНЕ особено денеска на вашиот роденден“,
нагласува генералниот секретар на ЕПП во видеопорака.
Опозициската ВМРО-ДПМНЕ вчера во Охрид го одбележа 31. роденден, а партискиот лидер Христијан Мицкоски ја претстави новата стратегија на партијата, под мотото „Македонија за сите луѓе“. Тој најави и визуелно ребрендирање на партијата, која, меѓу другото, ќе користи осум бои во својата иконографија.
„Нашата иднина е економски развиена држава, членка на Европската Унија и на НАТО. Затоа, кажете им на тие кои се уште не чуле дека ВМРО-ДПМНЕ ги има боите на Македонија и дека не бега од своите корени, но и дека има јасен план за нашата заедничка македонска иднина. Ние се обраќаме кон сите кои своите идеали ги наоѓаат во десниот политички спектар на Македонија и тоа од мекиот центар, до крајната десница. Кои доколку се здружат, ќе нема кој да ги победи“,
рече Мицкоски, кој најави и обединување на опозицискиот блок пред есенските локални избори.