Министерката за надворешни работи на БиХ ја потврдила информацијата за иницијативата на Австрија, Унгарија, Полска, Чешка и Словачка
Четири земји од „Вишеградската група“ – Унгарија, Полска, Чешка и Словачка, како и Австрија, испратиле нов нон-пејпер до раководството на Европската Унија, што се однесува на Западен Балкан, како што јави сараевскиот портал Кликс.
Повикувајќи се на дипломатски извори, Кликс објави дека документот не се занимава со прашањето на границите, но бара од Европската Унија поголема поддршка за целиот Западен Балкан.
Министрите за надворешни работи на четирите земји, исто така, бараат земјите и граѓаните на Западен Балкан да бидат вклучени во официјалните разговори за иднината на Европската Унија, бидејќи, според нив, тие имаат право и треба да имаат можност да ги искажат своите ставови за иднината на Унијата. Како што се наведува, многу прецизно е наведено дека Западен Балкан треба да биде дел од иницијативата на Конференцијата за иднината на ЕУ, која беше започната во рамки на овој блок.
Министерката за надворешни работи на БиХ, Бисера Турковиќ, ја потврдила информацијата за нон-пејперот, додавајќи дека е запознаена со содржината што ја смета за исклучително важна и треба да се поздрави.
„Ние сме официјално запознаени и среќна сум со ваквиот пристап. Босна и Херцеговина, како и другите земји во регионот, имаат јасна перспектива за членство“,
нагласила Турковиќ.
Иницијативата на групата држави, како што е најавено, треба да биде испратена до раководството на Европската Унија, вклучително и Европската комисија и комесарот за проширување, Оливер Вархеји.