Словенија, Австрија и Чешка изразуваат поддршка за да се одржи првата меѓувладина конференција меѓу ЕУ и С Македонија. Шефовите на дипломатијата на овие три држави денеска во Скопје остварија средба со македонскиот министер за надворешни работи, Бујар Османи и порачаа дека не треба да има нови одложувања во процесот за пристапување кон ЕУ.
„Нашата зедничка посета на Северна Македонија има цел да испрати јасна и гласна порака дека сериозно го цениме напредокот којшто земјата го направи до сега во процесот на пристапување кон ЕУ. Почетокот, всушност на вистинските преговори за членство на Северна Македонија одамна доцни и Чешка, Австрија и Словенија, како и други истомисленици меѓу земјите членки на ЕУ силно ја поддржуваат иницијативата на португалското претседателство со Унијата да се организира првата меѓувладина конференција во јуни. Не смее да има нови одложувања“,
рече чешкиот министер за надворешни работи, Јакуб Кулханек.
Министерот за надворешни работи на Австрија, Александер Шаленберг, вели дека целта е целосно членство на С Македонија и Албанија во Унијата, бидејќи тоа е и стратешки интерес.
„Европското обединување не е целосно се додека сите земји од Западен Балкан не станат членка на ЕУ. Сите знаеме дека има важни билатерални прашања. Ние сметаме дека билтералните прашања не треба да го блокираат процесот на пристапување, но мислам дека сите се согласуваме дека мора да се справуваме со прашањата и затоа целосно ги поддржуваме напорите на португалското претседателство, заедно со министрите овде и во Софија и целосно ги поддржуваме напорите на следното словенечко претседателство кое ќе се одржи есента, многу важен самит за Западниот Балкан“,
рече Шаленберг.
Шефот на дипломатијата на Словенија, Анже Логар, рече дека Западниот Балкан е многу важно прашање за претстојното претседателство на Словенија со ЕУ.
„Словенија секогаш вложува многу напори во остварувањето дијалог и знаеме дека со добар дијалог можеме да ги постигнеме резултатите што сакаме да ги постигнеме и сакаме да ве поттикнеме да продолжите по тој пат. Гледаме многу позитивни подобрувања, што беа презентирани денеска и исто така задволство ни е што претседателите на Северна Македонија и Бугарија заедно ќе отпатуваат в среда во Рим“,
рече Логар.
Тој истакна дека посетата на Рим е одлична можност да се дискутира за прашањето, а во меѓувреме, тој посочи дека министрите за надворешни работи ќе направат се што можат да и помогнат на Северна Македонија и нејзиниот пат кон ЕУ, како и започнување на Меѓувладина конференција.
Неформалната група Ц5, но и соодветно на географската близина, Австрија, Чешка, но и Словенија како следен претседавач со ЕУ и останатите земји од оваа група претставуваат непосредно соседство на Западниот Балкан, вели министерот за надворешни работи, Бујар Османи. Тој вели дека денешната посета е навремена односно точно 30 дена пред да се одржат јунско-јулските состаноци во ЕУ.
„Ние денеска не го усогласувавме нивниот став затоа што нивниот став по однос на европските интеграции на регионот и на Северна Македонија одамна е познат. Јас денеска побарав и добив силни пораки на согласност од колегите дека оваа нивна енергичност, овој напор и гласност во рамки на Унијата ќе продолжи. Во овој условно асиметричен спор со кој се соочуваме се разбира ни се потребни пријатели за да ни озвоможат и фер платформа, и фер политички простор за да можеме преку дијалог да ги отстраниме пречките за продолжување на нашите европски интеграции“,
рече Османи.