За иницијативата за референдум на оние кои се против дигитализацијата и за протестите, Царовска вели дека тоа нивно право е легитимно, но смета дека причината поради која се користи ова право е апсурдна
Треба да се прави разлика помеѓу дигитализација на наставата и дигитализација на учебници. Сега МОН работи на дигитализација на дел од учебниците и на материјалите за учење, само за четврто одделение, а не на дигитализација на наставата, вели министерката за образование Мила Царовска, посочувајќи дека тоа се две различни работи.
„Тоа не значи дека учениците цело време ќе бидат пред компјутер или таблет. Наставата останува да се реализира како и досега, при што најважно средство за совладување на наставната материја е интеракцијата ученик – ученик, наставник-ученик“,
рече Царовска во интервју за Сител.
Во однос на реакциите дека на ваков начин, учебниците нема да бидат достапни за сите деца, Царовска вели дека за прв пат во земјава се носи закон со кој се гарантира обезбедување на ИТ уреди за децата од социјално ранливите категории.
„Поголемиот дел од учениците веќе имаат уреди и тоа го утврдиме оваа учебна година преку успешното следење на онлајн наставата. Овие учебници нема да бараат посебни перформанси. Сите оние коишто не можат да си дозволат за прв пат тоа го гарантираме со законот, државата и општината да им обезбедат уреди. Сега во моментот ученикот којшто нема дигитален уред, има само книга, далеку повеќе уназадува од ученикот којшто има и таблет и книга и компјутер и други можности за информирање. Токму затоа ги изедначуваме правата на децата коишто досега немале можност да се сретнат со дигитални алатки и дигитална мултимедијална содржина“,
рече Царовска.
За иницијативата за референдум на оние кои се против дигитализацијата и за протестите, Царовска вели дека тоа нивно право е легитимно, но смета дека причината поради која се користи ова право е апсурдна.