Носителите на јавни функции треба да се воздржат од јавно изнесување ставови со кои се изразува сомнеж во кредибилноста на истражувачките новинарски стории, реагира Агенцијата за аудио и аудиовизуелни медиумски услуги по коментарите на премиерот Зоран Заев во врска со истражувањето на ИРЛ за загадувањето на воздухот, каде што тој оценува дека не била застапена втора страна во приказната.
„Истражувачкото новинарство е клучно во остварувањето на улогата на медиумите да ги откриваат и анализираат прашањата од јавен интерес и да служат како коректив на властите. Во овој контекст, новинарите не треба да бидат обесхрабрувани, напротив, треба да се поттикнуваат во истражувањето различни теми поврзани со евентуални појави на корупција или злоупотреби од страна на институции или поединци. Доколку некоја засегната страна смета дека не се испочитувани стандардите и принципите на однесување утврдени во новинарските кодекси може да ги искористи постоечките механизми и да се обрати до саморегулаторните тела“,
се наведува во реакцијата од АВМУ.
И од ЗНМ ги осудија забелешките на премиерот како непримерни. Порачаа дека јавните коментари на функционери поврзани со истражувачката работа на новинарите може да поттикне сомнеж во кредибилноста на работата, а со тоа и да се влијае на ограничување на слободата на изразувањето.
„Вакви ставови за работата на новинарите од страна на високи владини и партиски претставници може да создадат ,,ефект на ладење”, а со тоа да се одвратат новинарите да работат на теми поврзани со корупција и злоупотреба на власт. Дали некој новинарски продукт е етичен или не треба да одлучуваат саморегулативните тела. Доколку засегнатите страни на кои се однесува конкретната истражувачка сторија, имаат забелешки околу применетите етички стандарди, потсетуваме дека постојат функционални механизми на медиумска саморегулација каде секој граѓанин може да поднесе претставка“,
велат од ЗНМ.