Лидерот на Алијанса за Албанците вели дека, иако поминаа четири години од „крвавиот четврток“, сè уште има многу неразјаснети работи
Четири години по насилствата во Собранието, каде што лидерот на Алијанса за Албанците Зијадин Села беше меѓу најсериозно повредените, тој го посети осудениот Абдулфета Алими во затворот во Идризово. Алими беше вработен како обезбедување во Собранието, а според Села, токму тој е човекот што му го спасил животот.
Села вели дека Алими е единствениот човек што е невин, а е осуден за настаните од 27 април 2017 година.
„Единствената негова вина е тоа што јас денеска сум жив. Јас сум му многу благодарен за тоа, многу му е благодарно и моето семејство и бев тука во знак на благодарност. Живеам секој ден со совеста дека човекот што ми го спаси животот е во затвор. Тоа е неправедно“,
рече Села.
Тој вели дека, иако поминале четири години од тој настан, сè уште има неразјаснети работи.
„Ако ја видите снимката од 27 април, кажете ми дали има отпор од униформираната полиција да ја запре толпата. Нема! А тогашниот министер Агим Нухиу продолжува да ужива на државна позиција. Луѓето што ги отворија вратите беа амнестирани. Организаторите беа амнестирани и имунитетот не им беше одземен од СДСМ и ДУИ. Сега јавно ги прашувам ДУИ и Али Ахмети да кажат дали знаат кој е нивниот висок функционер што тој ден го извести Никола Груевски за изборот на претседател на Собранието“,
рече Села.