Амбасадорката на САД во Тирана апелира политичките лидери да бидат воздржани, а надлежните колку е можно побрзо во целост да го испитаат инцидентот и да ги откријат сторителите
Активист на Социјалистичката партија на албанскиот премиер Еди Рама е убиен а други четири лица се повредени во вооружен инцидент во градот Елбасан
Меѓу повредените има и припадничка на специјалната полициска единица „Ренеа“, која не била на должност, но се наоѓала во близина и дошла да помогне. Напаѓачот е нејзин поранешен колега.
Според медиумите, убениот е Пјетри Џувани, кој неодамна ја напуштил партијата Движење за социјалистичка интеграција и се приклучил кон социјалистите. Инцидентот се случил пред канцеларијата на опозициската Демократска партија.
Полицијата привела 27 лица, а осуммина од нив приврзаници на Демократската партија. Како доказен материјал е запленет и автомобил со затемнети стакла, со кој стигнал напаѓачот.
Како што пренесуваат медиумите, на вооружената престрелка и претходела расправија меѓу прврзанците на двете партии поради купување гласови во Елбасан, пред парламентарните избори в недела.
Амерканската амбасадорка во Тирана, Јури Ким, по инцидентот, ги повика надлежните колку е можно побрзо во целост да го испитаат инцидентот, да ги откријат сторителите и соодветно да ги казнат.
„Со посебно внимание ги следиме извештаите за денешното насилство во Елбасан, кое заврши со смрт на едно лице и уште неколку повредени. Ги повикуваме службените лица за спроведување на законот што побрзо и во целост да го испитаат овој инцидент, да ги идентификуваат сторителите и да ги казнат согласно законот. Инволвираните во вакво насилство треба да бидат казнети“,
се наведува во реакцијата.
Амбасадорката апелира претседателот Илир Мета, лидерот на социјалистите и премиер Еди Рама и лидерот на опозициските демократи, Љуљзим Баша да бидат воздржани и така да се однесуваат.
„Нашите постапки треба да се засноваат на факти, а не на страв или озборувања. Кога само неколку дена не делат од изборите на 25 април, ја повторуваме нашата изјава од 26 март со која ги повикуваме лидерите – оние кои се на власт и оние кои бараат власт – експлицитно да го отфрлат насилството“,
се посочува во реакцијата.
Пред два дена во Каваја со огнено оружје беше пукано во штаб на Демократската партија на Љуљзим Баша, при што со прострелна рана во нога се здоби секретарот на општинската организација на оваа партија. Полицијата потврди дека нападот не е поврзан со партиски активности, а лицето кое пукаше е во бегство.