Американските здравствени власти вчера препорачаа привремено да запре употребата на вакцината на „Џонсон и Џонсон“ поради случаи на згрутчување на крвта
Вакцинацијата против ковид-19 во САД не е доведена во прашање, изјави американскиот претседател Џо Бајден по одлуката за „пауза“ на употребата на вакцината на „Џонсон и Џонсон“ против коронавирусот поради случаи на појава на згрутчување на крвта.
„И со привремен прекин на вакцинацијата со вакцината на ‘Џонсон и Џонсон’, постои огромна понуда на вакцини на ‘Фајзер’ и ‘Модерна’, доволно за вакцинацијата да не биде доведена во прашање, за секој Американец“,
изјави Бајден.
Американските здравствени власти вчера препорачаа „пауза“ во употребата на вакцината на „Џонсон и Џонсон“.
Агенцијата за лекови (ФДА) испитува шест пријавени случаи на тежок облик на тромб во САД по приемот на вакцината.
Центарот за контрола и превенција на болести, водечка агенција за јавно здравје во САД, треба да се состане денеска за да ја процени ситуацијата.